హైదరాబాద్: ప్రజాస్వామ్యంలో బలమైన ప్రతిపక్షం ప్రభుత్వానికి ఒక దిక్సూచిలా పనిచేయాలి. పాలకపక్షం దారితప్పినప్పుడు హెచ్చరిస్తూ, ప్రజాసమస్యలపై నిలదీస్తూ ‘వాచ్ డాగ్’ పాత్ర పోషించాలి. కానీ, ప్రస్తుత తెలంగాణ రాజకీయాలను గమనిస్తే.. ఇటు ప్రధాన ప్రతిపక్షం బీఆర్ఎస్, అటు కేంద్రంలో అధికారంలో ఉండి ఇక్కడ బలపడాలని చూస్తున్న బీజేపీ.. రెండూ కూడా ఆశించిన స్థాయిలో నిర్మాణాత్మక పాత్ర పోషించడంలో ఘోరంగా వెనుకబడ్డాయనే విమర్శలు వ్యక్తమవుతున్నాయి. ప్రజాసమస్యలపై పోరాడటంలో రెండు పార్టీలూ ‘దొందూ దొందే’ అన్నట్లుగా వ్యవహరిస్తున్నాయనేది రాజకీయ విశ్లేషకుల అభిప్రాయం.
గ్యారంటీల చుట్టూనే రాజకీయం.. విస్తృత ప్రజాసమస్యల విస్మరణ!
ప్రస్తుత కాంగ్రెస్ ప్రభుత్వం అధికారంలోకి వచ్చిన నాటి నుండి ప్రతిపక్షాల విమర్శలన్నీ కేవలం ‘ఆరు గ్యారంటీల’ అమలు చుట్టూనే తిరుగుతున్నాయి. “ఆరు గ్యారంటీలు ఏమయ్యాయి? ఎప్పుడు అమలు చేస్తారు?” అని ప్రశ్నించడానికే ప్రతిపక్షాలు పరిమితమయ్యాయి. ఎన్నికల వాగ్దానాలను ప్రశ్నించడం తప్పేం కాదు, కానీ కేవలం దానిపైనే కాలయాపన చేస్తూ, అంతకంటే కీలకమైన ఇతర ప్రభుత్వ వైఫల్యాలను, ప్రజలు ఎదుర్కొంటున్న రోజువారీ సమస్యలను ఎండగట్టడంలో ఇరు పార్టీలు అట్టర్ ఫ్లాప్ అయ్యాయి.
‘వాచ్ డాగ్’ పాత్రలో వైఫల్యం
ఒక బాధ్యతాయుతమైన ప్రతిపక్షంగా ప్రభుత్వంపై నిరంతర నిఘా ఉంచడంలో అటు కేసీఆర్ నేతృత్వంలోని బీఆర్ఎస్, ఇటు కిషన్ రెడ్డి లేదా స్థానిక నాయకత్వంలోని బీజేపీ విఫలమయ్యాయి. పాలనాపరమైన లోపాలను ఇరు పార్టీలు విస్మరిస్తున్నాయి. విధివిధానాల రూపకల్పనలో లోపాలు, క్షేత్రస్థాయిలో పెండింగ్ ప్రాజెక్టులు, నిధుల కొరత వంటి అంశాలపై పటిష్టమైన వ్యూహంతో ప్రభుత్వాన్ని కార్నర్ చేయలేకపోతున్నాయి. అంతేగాక నిర్మాణాత్మక విమర్శలు కరవయ్యాయి. కేవలం సోషల్ మీడియా వేదికగా ట్వీట్లు చేయడం, ప్రెస్ మీట్లలో పరస్పర రాజకీయ ఆరోపణలు చేసుకోవడానికే ప్రాధాన్యత ఇస్తున్నారు తప్ప, అసెంబ్లీ లోపల కానీ, బయట కానీ ప్రజా సమస్యలపై రోడ్లెక్కి గట్టిగా నిలదీసిన సందర్భాలు తక్కువ.
సమన్వయ లోపం.. అంతర్గత బలహీనతలు
బీఆర్ఎస్ పార్టీ ఇంకా అధికార కోల్పోయిన షాక్ నుంచి, వలసల సంక్షోభం నుంచి పూర్తిగా కోలుకున్నట్లు కనిపించడం లేదు. కేవలం సోషల్ మీడియానే ఆధారం చేసుకుని బీఆర్ఎస్ రాజకీయం చేస్తుందన్న విమర్శలు వెల్లువెత్తున్న విషయం తెలిసిందే. దీనిపై పార్టీ అధినేత సైతం కీలక నేతలను హెచ్చరించినా ఫలితం లేకుండా పోయిందన్నది అంతర్గత చర్చ. మరోవైపు, బీజేపీకి బలమైన కేడర్, ప్రజాదరణ ఉన్నప్పటికీ.. రాష్ట్ర ప్రభుత్వ ప్రజావ్యతిరేక విధానాలపై ఒక నిర్దిష్టమైన కార్యాచరణను రూపొందించుకోలేకపోతోంది. ఫలితంగా పాలకపక్షం తప్పులను సమర్థవంతంగా ఎండగట్టే లీడర్షిప్ వ్యాక్యూమ్ (నాయకత్వ శూన్యత) స్పష్టంగా కనిపిస్తోంది.
చివరగా, ప్రభుత్వం తప్పు చేసినప్పుడు నిలదీసే బలమైన గొంతుక లేకపోతే నష్టపోయేది ప్రజలే. ఇప్పటికైనా బీఆర్ఎస్, బీజేపీలు తమ పాత వైఖరిని వీడి, కేవలం రాజకీయ ప్రయోజనాల కోసం కాకుండా, తెలంగాణ ప్రజల తరపున గళం విప్పే నిజమైన వాచ్ డాగ్ పాత్రను పోషించాల్సిన అవసరం ఎంతైనా ఉంది. లేనిపక్షంలో, అసమర్థ ప్రతిపక్షాలుగా ప్రజాక్షేత్రంలో మరింత వెనుకబడిపోయే ప్రమాదం ఉంది.
