శ్రీశైలంలో అంగరంగ వైభవంగా దసరా ఉత్సవాలు.. మహాగౌరి అలంకారంలో భక్తులకు దర్శనమిచ్చిన భ్రమరాంబికా దేవి!

మహాగౌరి అలంకారంలో అమ్మవారి దివ్యరూపం

దసరా మహోత్సవాల్లో ఎనిమిదవ రోజైన దుర్గాష్టమి సందర్భంగా శ్రీభ్రమరాంబికాదేవి ‘మహాగౌరి’ అలంకారంలో భక్తులకు దివ్య దర్శనమిచ్చారు. ఆలయ ప్రాంగణంలో ప్రత్యేకంగా సిద్ధం చేసిన వేదికపై అమ్మవారిని వివిధ రకాల సుగంధ పుష్పాలు, బిల్వదళాలతో శోభాయమానంగా అలంకరించారు. వేదపండితులు మరియు అర్చకులు వేదమంత్రాల ఉచ్చారణల నడుమ, మంగళవాయిద్యాల ధ్వనుల మధ్య అమ్మవారికి శాస్త్రోక్తంగా పూజలు నిర్వహించారు. సుగంధ ద్రవ్యాలు, ధూపదీప నైవేద్యాలతో అమ్మవారికి విధివిధానంగా నీరాజనాలు సమర్పించారు.

నందివాహనంపై స్వామి-అమ్మవార్ల గ్రామోత్సవం

అమ్మవారి మహాగౌరి పూజానంతరం శ్రీ మల్లికార్జున స్వామి మరియు భ్రమరాంబికా దేవి ఉత్సవమూర్తులను నందివాహనంపై ఆశీనులను చేసి కర్పూర హారతులిచ్చారు. అనంతరం స్వామి అమ్మవార్లు వైభవంగా గ్రామోత్సవానికి వేంచేశారు. బాజా భజంత్రీలు, బ్యాండ్ వాయిద్యాల మోతలతో ఆలయ వీధుల గుండా సాగిన ఈ గ్రామోత్సవంలో ఊరేగుతున్న దివ్యదంపతులను దర్శించుకుని భక్తులు నీరాజనాలు అర్పిస్తూ తమ భక్తిప్రపత్తులను చాటుకున్నారు.

గిరిజన నృత్యాలు, కళారూపాల కోలాహలం

ఈ గ్రామోత్సవ ఊరేగింపులో పల్లె సంస్కృతి, సాంప్రదాయ కళారూపాలు ప్రత్యేక ఆకర్షణగా నిలిచాయి. ఉత్సవమూర్తుల ఊరేగింపు ముందుకు కదులుతుండగా కేరళ చండి మేళం, కోలాటాలు, కొమ్ము కోయ నృత్యం, రాజబటుల వేషధారణలు, చెక్క భజనలు మరియు సంప్రదాయ విళక్క నృత్యాలు భక్తులను ఎంతగానో అలరించాయి. ఈ వేడుకల్లో ఆలయ చైర్మన్ పోతుకుంట రమేష్ నాయుడు, ఈఓ శ్రీనివాసరావు దంపతులు, ఆలయ ట్రస్ట్ బోర్డ్ సభ్యులు, అధికారులు, విశేష సంఖ్యలో భక్తులు పాల్గొని స్వామి-అమ్మవార్ల కృపకు పాత్రులయ్యారు.