యుద్ధ ట్యాంకుల ఉక్కు కోసం చైనాపై ఆధారపడే ప్రసక్తే లేదు: డొనాల్డ్ ట్రంప్

మెరుగైన ఆయుధాలు.. రాయబారి వ్యాఖ్యలపై క్లారిటీ

అమెరికా తయారు చేసే సైనిక ఆయుధాలు ప్రపంచంలోనే అత్యంత అధునాతనమైనవి, మెరుగైనవి అని ఈ సందర్భంగా ట్రంప్‌ కొనియాడారు. అయితే, చైనాకు ఆయుధాలు విక్రయించే అంశం గురించి అమెరికా రాయబారి డేవిడ్‌ పెర్డ్యూ ఫాక్స్‌ న్యూస్‌ ఇంటర్వ్యూలో పేర్కొన్నారని విలేకరి ప్రస్తావించగా.. ట్రంప్‌ ఆశ్చర్యం వ్యక్తం చేశారు. “చైనాకా? బహుశా ఆయన తైవాన్‌ గురించి మాట్లాడి ఉంటారు” అని అభిప్రాయపడిన ట్రంప్‌, ఆ రాయబారి వ్యాఖ్యలపై పూర్తి వివరాలు తెలుసుకుంటానని వెల్లడించారు.

సమావేశానికి 12 రేటింగ్.. అద్భుతమైన చర్చలు

జిన్‌పింగ్‌తో ఇటీవల తాను జరిపిన భేటీ అత్యంత అద్భుతంగా, సామరస్యపూర్వక వాతావరణంలో సాగిందని ట్రంప్‌ వెల్లడించారు. ఈ సమావేశానికి జీరో నుంచి పది వరకు రేటింగ్ ఇవ్వాల్సి వస్తే, తాను ఏకంగా 12 రేటింగ్ ఇస్తానని తెలిపారు. ఇరు దేశాల అగ్రనేతల మధ్య పరస్పర గౌరవం ఉట్టిపడేలా చర్చలు జరిగాయని, అయితే ఆ సమయంలో ఎలాంటి ఆయుధాల ఒప్పందాల ప్రస్తావన రాలేదని ఆయన మరోసారి తేల్చిచెప్పారు.

రక్షణ రంగంలో దేశీయ ఉత్పత్తికి అత్యంత ప్రాధాన్యం

అమెరికా రక్షణ రంగానికి ఎంతో కీలకమైన ఉక్కు (Steel) తయారీని దేశీయంగానే ప్రోత్సహించుకోవాల్సిన అవసరం ఉందని ట్రంప్‌ నొక్కిచెప్పారు. అత్యాధునిక యుద్ధ విమానాలు, యుద్ధ ట్యాంకుల తయారీ కోసం విదేశాలపై, ముఖ్యంగా చైనాపై ఆధారపడలేమని స్పష్టం చేశారు. ఈ సందర్భంగా అయోవాలో ఉక్కు పరిశ్రమ అభివృద్ధికి సంబంధించిన ప్రతిపాదనను ప్రస్తావించారు. చైనాతో పాటు కెనడాతోనూ వాణిజ్య సంబంధాలు బలంగా ఉన్నాయని, అన్ని దేశాలతోనూ సత్సంబంధాలు కొనసాగించడమే తమ విధానమని ట్రంప్‌ పేర్కొన్నారు.