మినిట్2మినిట్ డెస్క్: ఎల్బీ నగర్ మెట్రో స్టేషన్కు అత్యంత సమీపంలో, ప్రజా సమస్యల పరిష్కారం కోసం ఏర్పాటు చేసిన మున్సిపల్ వార్డు ఆఫీసు పక్కనే నెలకొన్న దుస్థితి ఇది. చాలా రోజుల నుంచి నేలకొరిగిన బీఎస్ఎన్ఎల్ ల్యాండ్ లైన్ డిస్ట్రిబ్యూషన్ బాక్స్ (DP బాక్స్) ను ఎవరూ పట్టించుకోకపోవడం, దానిపై సంబంధిత అధికారుల అలసత్వాన్ని ప్రతిబింబిస్తోంది. “B S N L” అని స్పష్టంగా రాసి ఉన్న ఆ బాక్స్, ఎండకు ఎండి, వానకు తడిసి పాడవుతోందని, రోడ్డు పక్కన పడి ఉండటం వల్ల, పాదచారులకు, వాహనదారులకు తీవ్ర అసౌకర్యం కలిగిస్తోందని స్థానికులు అంటున్నారు. చాలా రోజుల నుంచి ఈ బాక్స్ ఇలాగే పడి ఉందని, ఎవరూ వచ్చి సరిచేయడం లేదని చెబుతున్నారు. దీన్ని చూస్తేనే అర్థమవుతోందని, బీఎస్ఎన్ఎల్ అధికారులు ఎంత నిర్లక్ష్యంగా ఉన్నారోనని స్థానికులు ఆవేదన వ్యక్తం చేస్తున్నారు. అంతేకాకుండా, అదే వార్డు ఆఫీసు పక్కన చెత్తకుప్పలు కూడా దర్శనమివ్వడం మరో విశేషం.
ఇక బీఎస్ఎన్ఎల్ అధికారులు వెంటనే స్పందించి, నేలకొరిగిన డీపీ బాక్స్ను సరిచేసి, సేవలను పునరుద్ధరించాలని స్థానికులు డిమాండ్ చేస్తున్నారు. మున్సిపల్ వార్డు ఆఫీసు పక్కనే ఇలాంటి సమస్యలు ఉంటే, ప్రజల సమస్యలను అధికారులు ఎలా పరిష్కరిస్తారనే ప్రశ్న తలెత్తుతోంది. అధికారులు తమ బాధ్యతలను సక్రమంగా నిర్వహించాలని, ప్రజల ఇబ్బందులను గమనించి, తగిన చర్యలు తీసుకోవాలని స్థానికులు కోరుతున్నారు.
