Srisailam Temple: నంద్యాల జిల్లాలోని ప్రముఖ శైవక్షేత్రం, ద్వాదశ జ్యోతిర్లింగాలలో ఒకటైన శ్రీశైలంలో భ్రమరాంబ సమేత మల్లికార్జున స్వామివార్లను శ్రీశైలం నియోజకవర్గ శాసనసభ్యులు బుడ్డా రాజశేఖర్ రెడ్డి శుక్రవారం భక్తిశ్రద్ధలతో దర్శించుకున్నారు. ఆలయ ప్రాంగణానికి చేరుకున్న ఆయనకు శ్రీశైల దేవస్థానం అధికారులు, ఏఈఓ వెంకటేశ్వరరావు, ఆలయ అర్చకులు శాస్త్రోక్తంగా, సంప్రదాయ ఆలయ మర్యాదలతో పూర్ణకుంభంతో సాదర స్వాగతం పలికారు.
రుద్రాభిషేకం, కుంకుమార్చన ప్రత్యేక సేవలు
స్వామివారిన దర్శనార్థం ఆలయంలోకి ప్రవేశించిన ఎమ్మెల్యే బుడ్డా రాజశేఖర్ రెడ్డి ముందుగా శ్రీశైల మల్లన్న ఆలయం చుట్టూ రెండుసార్లు ప్రదక్షిణలు చేశారు. అనంతరం రత్నగర్భ గర్భాలయంలో వెలసిన శ్రీ మల్లికార్జున స్వామివారికి పవిత్ర రుద్రాభిషేకం నిర్వహించారు. అలాగే అమ్మవారి ఆలయంలో భ్రమరాంబికా దేవికి ప్రత్యేక కుంకుమార్చన పూజలు జరిపించి, రాష్ట్ర ప్రజలు ఆయురారోగ్యాలు, సుఖసంతోషాలతో విలసిల్లాలని స్వామి అమ్మవార్లను ప్రార్థించారు.
ఆకట్టుకున్న ఎమ్మెల్యే నిరాడంబరత
దర్శనం ముగించుకుని ఆలయం నుంచి బయటకు వస్తున్న సమయంలో ఒక ఆసక్తికర సంఘటన చోటుచేసుకుంది. దర్శనం కోసం వచ్చిన ఒక చిన్నారిని ఎమ్మెల్యే ఆప్యాయంగా పలకరించారు. శ్రీశైల క్షేత్ర మహత్యాన్ని వివరిస్తూ, గర్భాలయం పైన ఉన్న శిఖర గోపురాన్ని ఆ చిన్నారికి చూపిస్తూ దాని ప్రాశస్త్యాన్ని వివరించడం అక్కడి భక్తులను విశేషంగా ఆకట్టుకుంది. ప్రజాప్రతినిధిగా ఆయన చూపిన ఈ నిరాడంబరత, పిల్లల పట్ల చూపిన వాత్సల్యం అక్కడ ఉన్నవారిని మురిపించింది.
వేదాశీర్వచనం, తీర్థప్రసాదాల అందజేత
పూజా కార్యక్రమాలు పూర్తయిన పిమ్మట అమ్మవారి ఆలయ ఆశీర్వచన మండపంలో క్షేత్ర వేదపండితులు ఎమ్మెల్యే బుడ్డా రాజశేఖర్ రెడ్డికి వేద మంత్రోచ్చారణల నడుమ ఆశీర్వచనం అందజేశారు. అనంతరం దేవస్థానం అధికారులు స్వామి అమ్మవార్ల శేషవస్త్రాలు, పవిత్ర తీర్థప్రసాదాలు, శ్రీశైల మల్లన్న జ్ఞాపికను (చిత్రపటాన్ని) ఆయనకు అందజేసి ఘనంగా సత్కరించారు. ఈ కార్యక్రమంలో పలువురు స్థానిక నాయకులు, ఆలయ అధికారులు పాల్గొన్నారు.
