Gandhi Jayanti: జాతిపిత మహాత్మా గాంధీ ఆశయాలు ఎప్పటికీ మానవాళికి మార్గదర్శకంగా నిలుస్తాయని, బాపూజీ చూపిన బాటలో నడుస్తూ మెరుగైన సమాజంతో పాటు ‘వికసిత భారత్’ నిర్మాణం దిశగా ప్రతి ఒక్కరూ ముందుకు సాగాలని ప్రధానమంత్రి నరేంద్ర మోదీ పిలుపునిచ్చారు.
మహాత్మా గాంధీ జయంతిని పురస్కరించుకుని శుక్రవారం ఆయన దేశవ్యాప్తంగా బాపూజీకి ఘనంగా నివాళులర్పించారు. ‘ఎక్స్’ (ట్విట్టర్) వేదికగా మరియు ప్రత్యేక వీడియో సందేశం ద్వారా ప్రధాని స్పందిస్తూ.. సత్యం, అహింస, కరుణ, సేవలకు నిలువెత్తు నిదర్శనమైన గాంధీజీ జీవితం ప్రతి కాలంలోనూ ప్రజలకు మార్గం చూపుతుందని కొనియాడారు. అధికారానికి దూరంగా ఉన్నప్పటికీ కోట్లాది మంది ప్రజల హృదయాల్లో ఆయన ఎప్పటికీ చిరస్థాయిగా నిలిచిపోతారని పేర్కొన్నారు.
ఖాదీ ఉత్పత్తుల వినియోగాన్ని ప్రోత్సహించిన ప్రధాని – ఘనంగా లాల్‌ బహదూర్‌ శాస్త్రి జయంతి వేడుకలు:
ఈ సందర్భంగా గాంధీజీ ఎంతో ప్రాధాన్యమిచ్చిన స్వదేశీ భావనను, ఖాదీ ప్రాముఖ్యతను ప్రధాని మోదీ ప్రత్యేకంగా గుర్తుచేశారు. గాంధీ జయంతి రోజున ప్రతి ఒక్కరూ ఖాదీ ఉత్పత్తులను కొనుగోలు చేసి, స్వదేశీ వస్తువులను గర్వంగా వినియోగించాలని కోరారు.
ఇదే రోజున దేశ రెండో ప్రధానమంత్రి లాల్‌ బహదూర్‌ శాస్త్రి జయంతిని పురస్కరించుకుని న్యూఢిల్లీలోని విజయ్‌ఘాట్ వద్ద ఆయన సమాధికి ప్రధాని మోదీ నివాళులర్పించారు. ‘జై జవాన్ – జై కిసాన్’ నినాదంతో సైనికుల్లో, రైతుల్లో అంకితభావాన్ని నింపిన శాస్త్రి గారి నిరాడబరత, దేశభక్తి ఎంతో స్ఫూర్తిదాయకమని ప్రశంసించారు.
