బ్యాట్ వదిలినా, బాధ్యత వదలని ‘కెప్టెన్ కూల్’.. సీఎస్‌కే మెంటార్‌గా ధోనీ!

MS Dhoni

MS Dhoni

MS Dhoni: ఇండియన్ ప్రీమియర్ లీగ్ (ఐపీఎల్) చరిత్రలో ఒక సువర్ణాధ్యాయానికి తెరపడింది. కోట్లాది మంది క్రికెట్ అభిమానులు ‘తలా’ అని ముద్దుగా పిలుచుకునే చెన్నై సూపర్ కింగ్స్ (సీఎస్‌కే) దిగ్గజ మాజీ కెప్టెన్ మహేంద్ర సింగ్ ధోనీ ఆటగాడిగా ఐపీఎల్‌కు వీడ్కోలు పలికారు. ఐపీఎల్ 2027 రిటెన్షన్ గడువుకు ముందు సీఎస్కే యాజమాన్యం ఈ కీలక ప్రకటన చేయడంతో అభిమానులు ఒక్కసారిగా భావోద్వేగానికి లోనయ్యారు. అయితే, మైదానంలో బ్యాట్ పట్టకపోయినా చెన్నై జట్టుతో ధోనీ అనుబంధం కొనసాగనుంది. ఆయన ఇకపై సీఎస్‌కే ‘టీమ్ మెంటార్‌’గా కొత్త బాధ్యతలు చేపట్టి జట్టుకు మార్గనిర్దేశం చేయనున్నారు.

మకుటం లేని మహారాజుగా 18 ఏళ్ల ప్రస్థానం

2008లో ఐపీఎల్ ఆరంభమైనప్పటి నుంచి 18 సీజన్ల పాటు ధోనీ మైదానంలో తనదైన ముద్ర వేశారు. ఇందులో 16 సీజన్లు చెన్నై సూపర్ కింగ్స్ తరఫున, 2 సీజన్లు రైజింగ్ పుణె సూపర్ జెయింట్ తరఫున ప్రాతినిధ్యం వహించారు. తన మొత్తం ఐపీఎల్ కెరీర్‌లో 278 మ్యాచ్‌లు ఆడిన ధోనీ, 242 ఇన్నింగ్స్‌లలో 38.30 సగటు మరియు 137.45 స్ట్రైక్ రేట్‌తో 5,439 పరుగులు సాధించారు. కెప్టెన్ కూల్‌గా వ్యూహాలు రచిస్తూ 2010, 2011, 2018, 2021, 2023 సంవత్సరాల్లో సీఎస్కేకు ఏకంగా 5 ఐపీఎల్ ట్రోఫీలను అందించి తిరుగులేని నాయకుడిగా నిలిచారు.

‘ధోనీ లేకుండా సీఎస్‌కే లేదు’:

ధోనీ వీడ్కోలు నేపథ్యంలో సీఎస్‌కే యజమాని ఎన్. శ్రీనివాసన్ అత్యంత భావోద్వేగపూరిత ప్రకటన విడుదల చేశారు. “ఎంఎస్ ధోనీ లేకుండా సీఎస్‌కే లేదు. ఆయన ఎప్పటికీ మా గుర్తింపులో ఒక భాగం. చెన్నై ఎల్లప్పుడూ ధోనీ సొంత ఇల్లే” అని కొనియాడారు. ఆటగాడిగా రిటైర్ అయినా, మెంటార్‌గా డగౌట్‌లో ధోనీ ఉండటం చెన్నై జట్టుకు కొండంత బలమని క్రీడా విశ్లేషకులు అభిప్రాయపడుతున్నారు.