TV Channels: దేశంలోని ప్రైవేట్ శాటిలైట్ టీవీ ఛానెళ్లకు కేంద్ర సమాచార, ప్రసార మంత్రిత్వ శాఖ పలు కీలక సూచనలు జారీ చేసింది. కార్యక్రమాల ప్రసారంలో కేబుల్ టెలివిజన్ నెట్‌వర్క్స్ (రెగ్యులేషన్) చట్టం-1995 కింద నిర్దేశించిన ‘ప్రోగ్రామ్ కోడ్’ను ప్రతి ఒక్కరూ ఖచ్చితంగా పాటించాలని స్పష్టం చేసింది. నిబంధనలను ఉల్లంఘిస్తే చట్ట ప్రకారం కఠిన చర్యలు తీసుకుంటామని హెచ్చరిస్తూ, మీడియా సంస్థలు మరింత బాధ్యతాయుతమైన రిపోర్టింగ్ విధానాన్ని పాటించాలని సమగ్ర ఆదేశాలు జారీ చేసింది.
వార్తల ప్రసారంలో అత్యంత బాధ్యతాయుతంగా వ్యవహరించాలని, ముఖ్యంగా ఉగ్రవాద వ్యతిరేక ఆపరేషన్లను ప్రత్యక్ష ప్రసారం (లైవ్) చేయకూడదని మంత్రిత్వ శాఖ ఆదేశించింది. హింసాత్మక దృశ్యాలను చూపించే విషయంలో తగిన జాగ్రత్తలు తీసుకోవాలని, లైంగిక నేరాల బాధితుల గుర్తింపును ఎట్టిపరిస్థితుల్లోనూ బయటపెట్టకూడదని స్పష్టం చేసింది. భారతదేశానికి సంబంధించిన మ్యాప్‌లను ప్రసారం చేసేటప్పుడు కేవలం ప్రామాణికమైన అధికారిక మ్యాప్‌లనే ఉపయోగించాలని సూచించింది.
మతపరమైన ఉద్రిక్తతలను రెచ్చగొట్టే లేదా దేశ వ్యతిరేక భావాలను ప్రోత్సహించే కంటెంట్ ప్రసారం కాకుండా గట్టి జాగ్రత్తలు వహించాలని పేర్కొంది. అలాగే నేటి డిజిటల్ యుగంలో వార్తలు, కార్యక్రమాల తయారీలో కృత్రిమ మేధ (AI) సాధనాలను ఉపయోగించే సమయంలో అత్యంత అప్రమత్తంగా ఉండాలని సూచించింది. ప్రసారమయ్యే కంటెంట్ విశ్వసనీయతను నిరంతరం నిర్ధారించేందుకు ఎడిటోరియల్ పర్యవేక్షణను మరింత బలోపేతం చేయాలని పేర్కొంది. ఈ మార్గదర్శకాల ద్వారా టీవీ ఛానెళ్లు బాధ్యతాయుతమైన జర్నలిజం ప్రమాణాలను పాటిస్తూ, సమాజ శ్రేయస్సును, దేశ భద్రతను కాపాడాలని కేంద్రం స్పష్టం చేసింది.
