ఎల్‌ఐసీ ఏజెంట్ నుంచి కల్కి భగవాన్ వరకు.. ఒక ఆధ్యాత్మిక ప్రస్థానం ముగిసింది!

Kalki Bhagwan: ప్రసిద్ధ ఆధ్యాత్మిక గురువు, ఒన్‌నెస్ మూవ్‌మెంట్ (Oneness Movement) వ్యవస్థాపకులు కల్కి భగవాన్ (77) మంగళవారం మధ్యాహ్నం చెన్నైలోని ఒక ప్రైవేట్ ఆసుపత్రిలో చికిత్స పొందుతూ కన్నుమూశారు. గత కొన్ని రోజులుగా అనారోగ్యంతో బాధపడుతున్న ఆయన ఆసుపత్రిలో చికిత్స పొందుతూ తుదిశ్వాస విడిచారు. ఆయన మృతి వార్తతో దేశవిదేశాల్లోని వేలాది మంది భక్తులు తీవ్ర దిగ్భ్రాంతికి గురయ్యారు.

ఏకమ్ క్షేత్రంలో భక్తుల దర్శనార్థం పార్థివదేహం

కల్కి భగవాన్ భౌతికకాయాన్ని బుధవారం ఉదయం 11 గంటలకు తిరుపతి జిల్లా వరదయ్యపాళెం మండలం బాతవల్లెంలోని ప్రసిద్ధ ‘ఏకమ్’ (గోల్డెన్ సిటీ) క్షేత్రానికి తరలించనున్నారు. భక్తులు, అనుచరులు, ప్రముఖుల తుది దర్శనం కోసం పార్థివదేహాన్ని అక్కడ ఉంచనున్నారు. కల్కి భగవాన్‌‌కు చివరిసారిగా నివాళులర్పించేందుకు తెలుగు రాష్ట్రాలతో పాటు తమిళనాడు, కర్ణాటక, ఇతర దేశాల ప్రజలు, భక్తులు భారీగా తరలివచ్చే అవకాశం ఉండటంతో ఆశ్రమ వర్గాలు ప్రత్యేక ఏర్పాట్లు చేస్తున్నాయి.

శనివారం అంత్యక్రియలు – స్మారక మందిర నిర్మాణం

వరదయ్యపాళెంలోని ఏకమ్ క్షేత్ర ప్రాంగణంలోనే శనివారం రోజున కల్కి భగవాన్ అంత్యక్రియలు నిర్వహించేందుకు సర్వం సిద్ధం చేస్తున్నారు. ఆశ్రమ సంప్రదాయాల ప్రకారం ఈ కార్యక్రమాలు జరగనున్నాయి. అలాగే, ఆయన రెస్టింగ్ ప్లేస్ (సమాధి) వద్ద ఒక మహత్తరమైన స్మారక మందిరాన్ని కూడా నిర్మించేందుకు ఆశ్రమ నిర్వహణ ట్రస్ట్ ప్రణాళికలు సిద్ధం చేస్తోంది.

సామాన్య ఉపాధ్యాయుడి నుంచి ఆధ్యాత్మిక గురువుగా..

కల్కి భగవాన్ అసలు పేరు విజయ్ కుమార్. అధ్యాత్మిక మార్గంలోకి రాకముందు ఆయన కొంతకాలం పాఠశాల ఉపాధ్యాయుడిగా, ఆ తర్వాత ఎల్‌ఐసీ (LIC) ఏజెంట్‌గా పనిచేశారు. 1992వ సంవత్సరంలో ఆయన తనను తాను విష్ణువు పదవ అవతారమైన ‘కల్కి’గా ప్రకటించుకొని ఆధ్యాత్మిక ప్రస్థానాన్ని ప్రారంభించారు.

తొలుత కుప్పం నియోజకవర్గంలోని శాంతిపురంలో ఆశ్రమాన్ని ఏర్పాటు చేసిన ఆయన, ఆ తర్వాత తమిళనాడులోని తిరువళ్లూరు సమీపంలోని నేమం వద్ద ఆధ్యాత్మిక తరగతులు నిర్వహించడం ప్రారంభించారు. తదనంతరం వరదయ్యపాళెం పంచాయతీ గోవర్ధనపురంలో ‘కల్కి రూరల్ డెవలప్‌మెంట్ ట్రస్ట్’ పేరిట ప్రధాన కార్యాలయాన్ని నెలకొల్పారు.

అంతర్జాతీయ స్థాయిలో ప్రసిద్ధి

తన భార్య అమ్మ భగవాన్‌తో కలసి ఆయన పలు ధ్యాన కార్యక్రమాలు, ముక్తి దీక్షలు, జీవన మార్గదర్శక తరగతులు నిర్వహించారు. కల్కి రూరల్ డెవలప్‌మెంట్, ఒన్‌నెస్ (Oneness), లోక ఫౌండేషన్, ముక్తి వంటి అనేక ట్రస్టులను స్థాపించి సామాజిక, ఆధ్యాత్మిక సేవలు అందించారు. భారత్‌లోనే కాకుండా ప్రపంచవ్యాప్తంగా అనేక దేశాల్లో ఆయనకు లక్షలాది మంది అనుచరులు ఉన్నారు. ఆయన మృతి ఆధ్యాత్మిక లోకానికి తీరని లోటని భక్తులు సంతాపం వ్యక్తం చేస్తున్నారు.