ఇరవై ఏళ్ల వయసులో ఎలా పడితే అలా తిన్నా శరీరం త్వరగానే జీర్ణం చేసుకుంటుంది. కానీ, ముప్పై ఏళ్లలోకి (30s) అడుగు పెట్టగానే కథ మారుతుంది. ఈ వయసులో బాడీ మెటబాలిజం (జీవక్రియల రేటు) నెమ్మదిస్తుంది. హార్మోన్లలో మార్పులు రావడం, శారీరక శ్రమ తగ్గడం వల్ల బరువు వేగంగా పెరుగుతారు. అందుకే 30 ఏళ్లు దాటిన వారు ఆరోగ్యం విషయంలో ప్రత్యేక శ్రద్ధ పెట్టాలని, డైట్లో కొన్ని ముఖ్యమైన మార్పులు చేసుకోవాలని వైద్య నిపుణులు సూచిస్తున్నారు.
1. ఎముకల బలానికి క్యాల్షియం, విటమిన్ డి:
ముప్పై ఏళ్ల తర్వాత ఎముకల సాంద్రత క్రమంగా తగ్గుతూ వస్తుంది. భవిష్యత్తులో ఆస్టియోపోరోసిస్, కీళ్ల నొప్పుల బారిన పడకుండా ఉండాలంటే క్యాల్షియం అధికంగా ఉండే పాలు, పెరుగు, ఆకుకూరలు, రాగులను నిత్యం ఆహారంలో చేర్చుకోవాలి. విటమిన్ డి కోసం ప్రతిరోజూ ఉదయం కాసేపు ఎండలో నిలబడటం మంచిది.
2. గుండె ఆరోగ్యానికి ఒమేగా-3 ఫ్యాటీ యాసిడ్స్:
ఈ వయసు నుంచే రక్తపోటు (BP), కొలెస్ట్రాల్ పెరిగే అవకాశాలు ఎక్కువ. గుండెను పటిష్టంగా ఉంచుకోవడానికి బాదం, వాల్నట్స్, ఫ్ల్యాక్స్ సీడ్స్ (అవిసె గింజలు) లేదా వారానికి ఒకసారి చేపలు తినడం అలవాటు చేసుకోవాలి. ఇవి గుండె జబ్బుల ప్రమాదాన్ని తగ్గిస్తాయి.
3. కండరాల కోసం ప్రోటీన్ తప్పనిసరి:
వయసుతో పాటు కండరాల బలం తగ్గుతుంది. కాబట్టి గుడ్లు, చికెన్, పప్పుధాన్యాలు, పన్నీర్ వంటి ప్రోటీన్ ఎక్కువగా ఉండే ఆహారాన్ని తీసుకోవాలి. ఇది శరీరాన్ని ఫిట్గా ఉంచడంతో పాటు ఎక్కువ సేపు ఆకలి వేయకుండా చూస్తుంది.
4. యాంటీఆక్సిడెంట్లతో కూడిన ఆహారం:
చర్మంపై ముడతలు రాకుండా, వృద్ధాప్య ఛాయలు దరిచేరకుండా ఉండాలంటే కలర్ఫుల్ ఫ్రూట్స్ (బెర్రీస్, నారింజ, యాపిల్) మరియు కూరగాయలు ఎక్కువగా తినాలి.
5. వ్యాయామం చాలా ముఖ్యం:
కేవలం డైట్ మాత్రమే కాదు.. రోజుకు కనీసం 30 నుండి 45 నిమిషాల పాటు వాకింగ్, రన్నింగ్, సైక్లింగ్ లేదా యోగా వంటి వ్యాయామాలు చేయాలి. వారానికి రెండు సార్లు వెయిట్ ట్రైనింగ్ చేయడం వల్ల మెటబాలిజం మెరుగవుతుంది.
ముప్పైల్లో చేసే ఈ చిన్న ఇన్వెస్ట్మెంట్, మీ నలభై, యాభై ఏళ్ల వయసులో సూపర్ హెల్దీగా ఉండేలా చేస్తుంది.
