Srisailam Hundi: నంద్యాల జిల్లాలోని ప్రముఖ దివ్యక్షేత్రం శ్రీశైలంలో శ్రీ భ్రమరాంబ మల్లికార్జునస్వామి అమ్మవార్ల ఉభయ ఆలయాల హుండీ లెక్కింపు కార్యక్రమం అత్యంత పవిత్ర వాతావరణంలో పూర్తయింది. స్థానిక అక్కమహాదేవి అలంకార మండపంలో ఈ లెక్కింపు ప్రక్రియను నిర్వహించారు. భక్తులు తమ ఆరాధ్య దైవానికి సమర్పించుకున్న మొక్కులు, కానుకలను దేవస్థానం సిబ్బంది లెక్కించారు. మొత్తం 32 రోజుల వ్యవధిలో భక్తులు అందించిన ఈ కానుకల ద్వారా శ్రీశైల మల్లన్న దేవస్థానానికి భారీ ఆదాయం సమకూరింది.
కోట్లలో రాబడి.. వెండి, బంగారాల వెల్లువ
గత నెల రోజులకు పైగా భక్తులు సమర్పించిన కానుకల ద్వారా దేవస్థానానికి ఏకంగా 4 కోట్ల 22 లక్షల 29 వేల 240 రూపాయల నగదు లభించిందని ఆలయ చైర్మన్ పోతుకుంట రమేష్ నాయుడు, ఈవో శ్రీనివాసరావు వెల్లడించారు. కేవలం నగదు రూపంలోనే కాకుండా భక్తులు భక్తిశ్రద్ధలతో పసిడి, వెండి కానుకలను కూడా స్వామి అమ్మవార్లకు అర్పించారు. ఈ లెక్కింపులో 75 గ్రాముల 300 మిల్లీగ్రాముల బంగారం, అలాగే 2 కిలోల 900 గ్రాముల వెండి లభించినట్లు అధికారులు స్పష్టం చేశారు.
హుండీలో విదేశీ కరెన్సీ సందడి
ఈసారి శ్రీశైలం హుండీ లెక్కింపులో మరో ప్రత్యేకత సంతరించుకుంది. దేశీయ భక్తులతో పాటు విదేశాల నుంచి వచ్చిన భక్తులు, ఎన్‌ఆర్‌ఐలు కూడా మల్లన్నకు పెద్ద ఎత్తున కానుకలు సమర్పించారు. ఇందులో భాగంగా 417 యూఎస్ఏ డాలర్లు, 100 కెనడా డాలర్లు, 60 ఇంగ్లాండ్ పౌండ్లు, 500 ఒమాన్ బైసా, 65 యూఏఈ దిర్హామ్‌లు, 25 యూరోలు, 10 సౌదీ రియాల్స్, 10 న్యూజిలాండ్ డాలర్లు, 10 ఈజిప్టు పౌండ్లు, 2 సింగపూర్ డాలర్లు సహా పలు ఇతర దేశాల కరెన్సీ నోట్లు కూడా లెక్కింపులో బయటపడ్డాయి. శ్రీశైల క్షేత్ర మహత్యం విశ్వవ్యాప్తమైదనడానికి ఈ విదేశీ కరెన్సీనే నిదర్శనమని భావిస్తున్నారు.
పటిష్ట భద్రత నడుమ ప్రశాంతంగా లెక్కింపు
ఎలాంటి అవాంఛనీయ సంఘటనలకు తావులేకుండా, అత్యంత పారదర్శకంగా ఈ లెక్కింపు ప్రక్రియను పూర్తి చేశారు. సీసీ కెమెరాల నిఘా నేత్రాల మధ్య, పటిష్టమైన భద్రతా ఏర్పాట్ల నడుమ హుండీ లెక్కింపు సాగింది. ఈ కార్యక్రమంలో దేవస్థానం చైర్మన్ పోతుకుంట రమేష్ నాయుడు, ఈవో శ్రీనివాసరావుతో పాటు వివిధ విభాగాలకు చెందిన అధికారులు, ఆలయ సిబ్బంది మరియు స్వామివారి సేవలో తరిస్తున్న శివసేవకులు పెద్ద సంఖ్యలో పాల్గొని తమ సేవలను అందించారు.
