Hyderabad Cabs: హైదరాబాద్ మహానగరంలో వేలాది మంది ఆటో, క్యాబ్ డ్రైవర్ల జీవనోపాధిని కాపాడేందుకు తెలంగాణ ప్రభుత్వం తక్షణమే స్పందించాలని కేకేసీ జనరల్ సెక్రెటరీ తుమ్మ రాజశేఖర్ రెడ్డి విజ్ఞప్తి చేశారు. వియత్నాంకు చెందిన గ్రీన్ ఎస్‌ఎం కంపెనీ కిలోమీటర్‌కు ₹9 రేటుతో సేవలు అందించే అంశాన్ని, నగరంలో ఒకేసారి 2,000 ఎలక్ట్రిక్ కార్లను ప్రవేశపెట్టే ప్రతిపాదనను ప్రభుత్వం సమీక్షించాలని కోరారు.
అప్పుల ఊబిలో స్థానిక డ్రైవర్లు – రూ.9 రేటుతో కుదేలయ్యే ప్రమాదం!
నగరంలో వేలాది మంది డ్రైవర్లు తమ కుటుంబ పోషణ కోసం సొంతంగా వాహనాలు కొనుగోలు చేసి, బ్యాంకుల ద్వారా లక్షల రూపాయల అప్పులు చేశారు. ప్రతి నెలా వేల రూపాయల ఈఎంఐలు (EMI), పెట్రోల్, డీజిల్ ఖర్చులు, వాహన నిర్వహణ, ఇన్సూరెన్స్ భారాలను మోస్తూ రవాణా సేవలు అందిస్తున్నారు. ఇలాంటి పరిస్థితుల్లో గ్రీన్ ఎస్‌ఎం సంస్థ అనూహ్యంగా కిలోమీటర్‌కు రూ.9 తక్కువ రేటుతో సేవలు ప్రారంభిస్తే స్థానిక డ్రైవర్లకు బుకింగ్‌లు పూర్తిగా తగ్గిపోతాయని ఆందోళన వ్యక్తం చేశారు. ప్రయాణాలు తగ్గినా నెలవారీ ఫైనాన్స్ వాయిదాలు, నిత్యావసర ఖర్చులు ఆగవని, దీనివల్ల డ్రైవర్ల కుటుంబాలు రోడ్డున పడే ప్రమాదం ఉందని తెలిపారు.
2,000 కార్ల దిగుమతి.. నగర రవాణాపై సమగ్ర అధ్యయనం అవసరం
మార్కెట్‌లోకి ఒకేసారి 2,000 కార్లు ప్రవేశిస్తే పోటీ విపరీతంగా పెరిగి స్థానిక క్యాబ్, ఆటో కార్మికుల రోజువారీ ఆదాయం పడిపోతుందని వివరించారు. కొత్త కంపెనీల రాకను వ్యతిరేకించడం లేదని, కానీ అప్పులు చేసి వాహనాలు నడుపుకుంటున్న వారి పొట్ట కొట్టవద్దని కోరారు. 2,000 కార్లను అనుమతించే ముందే ట్రాఫిక్, పార్కింగ్, ఛార్జింగ్ సదుపాయాలు, డ్రైవర్ల ఉపాధిపై పడే ప్రభావంపై సమగ్ర అధ్యయనం చేయాలని డిమాండ్ చేశారు.
ఎలక్ట్రిక్ ఛార్జింగ్.. విద్యుత్ వ్యవస్థపై అదనపు భారం
2,000 ఎలక్ట్రిక్ వాహనాల ఛార్జింగ్ కోసం అవసరమయ్యే విద్యుత్ లభ్యత, సరఫరా సామర్థ్యంపై ప్రభుత్వం ముందస్తు ప్రణాళిక రూపొందించాలని కోరారు. వేసవి కాలంలో గృహ, పారిశ్రామిక విద్యుత్ డిమాండ్‌తో పాటు, ఎల్‌నీనో ప్రభావం వల్ల తలెత్తే వాతావరణ మార్పుల నేపథ్యంలో భారీ స్థాయి ఛార్జింగ్ అవసరాలు విద్యుత్ వ్యవస్థపై ఒత్తిడి పెంచవచ్చని పేర్కొన్నారు. ప్రజలకు విద్యుత్ కొరత రాకుండా సమతుల్య విధానం అమలు చేయాలని సూచించారు.
ప్రభుత్వానికి కేకేసీ ప్రధాన విజ్ఞప్తులు
- గ్రీన్ ఎస్‌ఎం కంపెనీ నిర్ణయించిన ₹9 కిలోమీటర్ రేటును వెంటనే పునఃపరిశీలించాలి.
2. 2,000 కార్ల ప్రతిపాదన వల్ల స్థానిక డ్రైవర్ల ఉపాధిపై పడే ప్రభావంపై సమగ్ర అధ్యయనం జరపాలి.
3. ఫైనాన్స్ ఈఎంఐలు, ఇంధన ఖర్చులను పరిగణనలోకి తీసుకుని ఆమోదయోగ్యమైన రేట్లపై చర్చించాలి.
4. ప్రభుత్వం, గ్రీన్ ఎస్‌ఎం ప్రతినిధులు, డ్రైవర్ సంఘాల నాయకులతో త్రైపాక్షిక సమావేశం ఏర్పాటు చేయాలి.
5. ఎలక్ట్రిక్ వాహనాల ఛార్జింగ్ వల్ల గృహ విద్యుత్ సరఫరాకు ఆటంకం కలగకుండా ముందస్తు ప్రణాళికలు రూపొందించాలి.
పోరాటం కంపెనీకి వ్యతిరేకం కాదని, కేవలం అన్యాయమైన రేట్లకు, డ్రైవర్ల ఉపాధి దెబ్బతినడానికి వ్యతిరేకమని కేకేసీ స్పష్టం చేసింది. కస్టమర్లకు సరసమైన ధరలు, డ్రైవర్లకు గౌరవప్రదమైన ఆదాయం లభించేలా తెలంగాణ ప్రభుత్వం చొరవ తీసుకుని న్యాయం చేయాలని తుమ్మ రాజశేఖర్ రెడ్డి కోరారు.
