ఎమ్మీస్‌లో హిస్టరీ క్రియేట్ చేసిన విజయ్ సేతుపతి.. ఇక హాలీవుడ్‌లో ‘మహారాజ’ రచ్చ!

న్యూయార్క్ ఎమ్మీ వేడుకల్లో మెరవనున్న భారతీయ ప్రతిభ

గతంలో 2016 ప్రైమ్‌టైమ్ ఎమ్మీ అవార్డుల వేదికపై నటి ప్రియాంక చోప్రా ప్రజెంటర్‌గా సందడి చేసిన సంగతి తెలిసిందే. అయితే ఇంటర్నేషనల్ ఎమ్మీస్ విభాగంలో ఒక భారతీయ నటుడికి ఈ గౌరవం దక్కడం ఇదే మొదటిసారి. భారతీయ ప్రతిభను ప్రపంచ వేదికలపై నిలబెట్టడంలో ఇంటర్నేషనల్ అకాడమీ ఆఫ్ టెలివిజన్ ఆర్ట్స్ & సైన్సెస్ బోర్డు సభ్యురాలు, నిర్మాత కవితా గుప్తా ఎంతో కృషి చేస్తున్నారు. 2024లో భారతీయ కమెడియన్ వీర్ దాస్‌ను ఎమ్మీ హోస్ట్‌గా పరిచయం చేసిన ఆమె, ఇప్పుడు విజయ్ సేతుపతికి ఈ వేదికను అందించడంలో కీలక పాత్ర పోషించారు.

హాలీవుడ్‌కు బాటలు పరిచిన ‘మహారాజ’ బ్లాక్‌బస్టర్

విజయ్ సేతుపతి సాధించిన మైలురాళ్లు కేవలం పురస్కారాల వేదికలకే పరిమితం కాలేదు. ఆయన 50వ చిత్రంగా వచ్చిన సస్పెన్స్ థ్రిల్లర్ ‘మహారాజ’ (2024) ప్రపంచవ్యాప్తంగా ప్రభంజనం సృష్టిస్తోంది. భారత్‌లోనే కాకుండా చైనా బాక్సాఫీస్ వద్ద దాదాపు రూ. 91.65 కోట్ల వసూళ్లను రాబట్టి భారీ విజయాన్ని అందుకుంది. ప్రపంచవ్యాప్తంగా ఓటీటీ వేదికలలో సైతం మిలియన్ల కొద్దీ వీక్షణలు సొంతం చేసుకుని అంతర్జాతీయ సినీ ప్రియుల దృష్టిని ఆకర్షించింది.

వెండితెరపై ఏ-లిస్ట్ హాలీవుడ్ స్టార్‌తో రీమేక్!

‘మహారాజ’ సృష్టించిన గ్లోబల్ ఇంపాక్ట్‌తో ఇప్పుడు ఈ చిత్రాన్ని హాలీవుడ్‌లో రీమేక్ చేసేందుకు సన్నాహాలు వేగవంతమయ్యాయి. ఒక ప్రముఖ హాలీవుడ్ ఏజెన్సీ ఈ సినిమా రీమేక్ హక్కుల కోసం సంప్రదించినట్లు నిర్మాత సుధన్ సుందరం ధ్రువీకరించారు. హాలీవుడ్‌కు చెందిన ఏ-లిస్ట్ (A-List) స్టార్ హీరోతో ఈ చిత్రాన్ని నిర్మించేందుకు ప్రణాళికలు సిద్ధమవుతున్నాయని, త్వరలోనే పూర్తి వివరాలు అధికారికంగా వెల్లడి కానున్నాయని ఆయన తెలిపారు.

మణిరత్నం-సాయి పల్లవితో సరికొత్త ప్రయాణం

ప్రస్తుతం విజయ్ సేతుపతి తన కెరీర్‌లో అత్యంత ఆసక్తికరమైన ప్రాజెక్ట్‌లతో బిజీగా ఉన్నారు. దిగ్గజ దర్శకుడు మణిరత్నం తెరకెక్కిస్తున్న ‘ఇంజి వెల్లం’ అనే ఫీల్ గుడ్ రొమాంటిక్ డ్రామాలో ఆయన కథానాయకుడిగా నటిస్తున్నారు. సహజనటి సాయి పల్లవితో కలిసి ఆయన స్క్రీన్ షేర్ చేసుకుంటుండటంతో ఈ సినిమాపై ఇప్పటికే భారీ అంచనాలు నెలకొన్నాయి. అంతర్జాతీయ గౌరవాలు, హాలీవుడ్ రీమేక్‌లు, దిగ్గజ దర్శకుల చిత్రాలతో విజయ్ సేతుపతి గ్లోబల్ స్థాయికి ఎదుగుతున్నారు.