Crop Loss: రాష్ట్రంలో అతివృష్టి, అనావృష్టితో రైతులు తీవ్రంగా నష్టపోతున్నా కూటమి ప్రభుత్వం పట్టించుకోవడం లేదని వైఎస్సార్‌సీపీ రాష్ట్ర అధికార ప్రతినిధి రేగిడి లక్ష్మణరావు విమర్శించారు. తుఫాన్ల కారణంగా లక్షల ఎకరాల్లో పంట నష్టం జరిగినా రైతులకు ఇప్పటివరకు ఎలాంటి సాయం అందలేదని ఆరోపించారు. శుక్రవారం వైఎస్సార్‌సీపీ కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడారు.
రాష్ట్రంలో ఒకవైపు కరువు, మరోవైపు వరుస తుఫాన్లతో రైతులు ఇబ్బందులు పడుతున్నారని, చంద్రబాబు ప్రభుత్వం మాత్రం రైతులను ఆదుకోవడంలో నిర్లక్ష్యంగా వ్యవహరిస్తోందని విమర్శించారు. మొంథా తుఫాన్ బాధితులకు కూడా ఇప్పటివరకు ఇన్‌పుట్ సబ్సిడీ అందించలేదని ఆరోపించారు. గత ప్రభుత్వంలో అమలు చేసిన ఉచిత పంటల బీమా, రైతు భరోసా కేంద్రాల సేవలు, గిట్టుబాటు ధరల కల్పన వంటి కార్యక్రమాలను ప్రస్తుత ప్రభుత్వం కొనసాగించలేకపోతోందని అన్నారు.
2026 జూన్ నుంచి ఆగస్టు వరకు సాధారణంగా 424.3 మిల్లీమీటర్ల వర్షపాతం నమోదు కావాల్సి ఉండగా, కేవలం 197.6 మిల్లీమీటర్లు మాత్రమే నమోదైందని తెలిపారు. రాష్ట్రంలోని 21 జిల్లాల్లో 388 మండలాలను కరువు ప్రాంతాలుగా ప్రకటించినప్పటికీ రైతులకు పరిహారం అందించలేదని విమర్శించారు.
అర్నబ్ తుఫాన్ కారణంగా 4.61 లక్షల హెక్టార్లలో వ్యవసాయ పంటలు, మరో 29,960 హెక్టార్లలో ఉద్యాన పంటలు దెబ్బతిన్నట్లు అధికారులు ప్రకటించారని పేర్కొన్నారు. తక్షణమే పంట నష్టాన్ని అంచనా వేసి రైతులకు ఇన్‌పుట్ సబ్సిడీ, పంటల బీమా పరిహారం అందించాలని డిమాండ్ చేశారు.
