భారతీయ డ్యామ్ ఇంజనీరింగ్ చరిత్రలోనే సరికొత్త అధ్యాయం
గోదారమ్మ ఉధృతికి అడ్డుకట్ట వేస్తున్న ఇంజినీరింగ్ అద్భుతం
స్పిల్ వే నిర్మాణంలో చైనా, బ్రెజిల్ రికార్డులకు బ్రేక్
50 లక్షల క్యూసెక్కుల డిశ్చార్జ్ సామర్థ్యం
నవయుగ నుంచి మేఘా వరకు అనితర సాధ్య ప్రయాణం!
మినిట్ 2 మినిట్, రాజమహేంద్రవరం (ఆగస్ట్ 10): ఆంధ్రప్రదేశ్ జీవనాడి, దేశంలోనే అత్యంత ప్రతిష్ఠాత్మక బహుళార్ధసాధక ప్రాజెక్ట్ అయిన ‘పోలవరం’ ప్రపంచ రికార్డుల దిశగా దూసుకుపోతోంది. సాగునీరు, తాగునీరు, హరిత విద్యుత్ లక్ష్యాలతో రూపుదిద్దుకుంటున్న ఈ ప్రాజెక్ట్, జాతీయ నీటి భద్రతకు సరికొత్త దిశానిర్దేశం చేస్తోంది. చైనాలోని ప్రసిద్ధ ‘త్రీ గోర్జెస్ డ్యామ్’, బ్రెజిల్-పరాగ్వే సరిహద్దుల్లోని ‘ఇటైపు డ్యామ్’ వంటి ప్రపంచ ప్రసిద్ధ నిర్మాణాల కంటే అద్భుతమైన సాంకేతిక పరిజ్ఞానంతో పోలవరం స్పిల్ వే రూపుదిద్దుకోవడం భారతీయ ఇంజనీరింగ్ రంగానికి గర్వకారణంగా నిలుస్తోంది.
ప్రపంచంలోనే అతిపెద్ద స్పిల్ వే.. 6.6 కి.మీ రికార్డు నదీ మళ్లింపు!
పోలవరం ప్రాజెక్టుకు ప్రధాన ఆకర్షణ 1.18 కిలోమీటర్ల పొడవైన దాని స్పిల్ వే. ప్రపంచంలోనే అత్యధికంగా 50 లక్షల క్యూసెక్కుల (1,41,435 క్యూమెక్స్) అత్యవసర వరద నీటిని సురక్షితంగా దిగువకు విడుదల చేసేలా 48 రేడియల్ గేట్లతో దీనిని డిజైన్ చేశారు. ఈ నిర్మాణం కోసం గోదావరి నది సహజ ప్రవాహాన్ని కుడి గట్టు వైపునకు 6.6 కిలోమీటర్ల మేర మళ్లించడం భారతీయ డ్యామ్ ఇంజనీరింగ్ చరిత్రలోనే సరికొత్త అధ్యాయం.
నవయుగ నుంచి MEIL వరకు.. దిగ్గజాల భాగస్వామ్యం!
పోలవరం ప్రాజెక్ట్ నిర్మాణంలో 2019 నవంబర్కు ముందు ‘నవయుగ’ సంస్థ అత్యంత కీలక పాత్ర పోషించింది. అతి తక్కువ సమయంలో రికార్డు స్థాయిలో కాంక్రీటింగ్ పనులు పూర్తి చేసి గిన్నిస్ బుక్ ఆఫ్ వరల్డ్ రికార్డ్స్లో చోటు సంపాదించడంతో పాటు స్పిల్ వే పనులకు బలమైన పునాది వేసింది. ఆ తర్వాత నవంబర్ 2019 నుంచి పనులను స్వీకరించిన మేఘా ఇంజనీరింగ్ అండ్ ఇన్ఫ్రాస్ట్రక్చర్స్ లిమిటెడ్ (MEIL) ఈ మెగా ప్రాజెక్ట్ను అదే వేగంతో, అత్యాధునిక ఇంజనీరింగ్ ప్రమాణాలతో ముందుకు తీసుకెళ్తోంది.
భారీ ఈసీఆర్ఎఫ్ డ్యామ్.. అత్యాధునిక డయాఫ్రమ్ వాల్!
నదికి అడ్డంగా 2.45 కిలోమీటర్ల మేర నిర్మిస్తున్న ఎర్త్-కమ్-రాక్ ఫిల్ (ECRF) ప్రధాన డ్యామ్ మూడు కీలక భాగాలుగా (Gap 1, Gap 2, Gap 3) రూపుదిద్దుకుంటోంది. జర్మనీకి చెందిన బావర్ (BAUER) సంస్థ సాంకేతిక భాగస్వామ్యంతో, నది గర్భంలో 95 మీటర్ల లోతు వరకు 1,372 మీటర్ల పొడవునా ప్లాస్టిక్ కాంక్రీట్తో నిర్మించిన ‘డయాఫ్రమ్ వాల్’ డ్యామ్కు పటిష్టమైన పునాదిని, లీకేజీ నిరోధక శక్తిని అందించింది.
దక్షిణ భారతదేశంలోనే అతిపెద్ద జలవిద్యుత్ కేంద్రం!
పర్యావరణ సమతుల్యతను కాపాడుతూ పచ్చని భవిష్యత్తు కోసం పోలవరం ప్రాజెక్ట్లో 960 మెగావాట్ల సామర్థ్యం కలిగిన భారీ జలవిద్యుత్ కేంద్రాన్ని ఏర్పాటు చేస్తున్నారు. ఇందులో 12 కప్లాన్ టర్బైన్ల (తలా 80 మెగావాట్లు) ద్వారా స్వచ్ఛమైన విద్యుత్ ఉత్పత్తి కానుంది. అంతేకాకుండా, జలచరాల సహజ వలసలకు భంగం కలగకుండా డ్యామ్-స్పిల్ వే కాంప్లెక్స్లో ప్రత్యేకంగా ‘ఫిష్ లాడర్’ నిర్మాణం, సహజ కొండలను డ్యామ్ నిర్మాణంలో భాగం చేయడం ఇక్కడి ప్రత్యేకత.
సెంట్రల్ వాటర్ కమిషన్ (CWC), పోలవరం ప్రాజెక్ట్ అథారిటీ (PPA) ల పర్యవేక్షణలో సాగుతున్న ఈ ప్రాజెక్ట్ కేవలం ఒక కట్టడం మాత్రమే కాదు.. కోట్లాది మంది రైతుల, ప్రజల భవిష్యత్తు. సాంకేతిక లోపాలు, రాజకీయ వివాదాలకు అతీతంగా ఈ మెగా ఇంజనీరింగ్ అద్భుతాన్ని వేగంగా పూర్తి చేసి, ఆంధ్రావని దాహార్తిని తీర్చి, అన్నదాతలకు జలసిరి అందించడమే వ్యవస్థ ముందున్న ప్రధాన బాధ్యత.
