Land Scam: చౌటుప్పల్ పరిసర ప్రాంతాల్లో అమాయక రైతుల అవసరాలను ఆసరాగా చేసుకుని కోట్ల విలువైన భూములను అక్రమంగా లాక్కుంటున్న భూదందా వ్యవహారం తీవ్ర కలకలం రేపుతోంది. అత్యవసరంగా అప్పు కావాల్సిన రైతుల పేదరికాన్ని, అమాయకత్వాన్ని ఆసరాగా చేసుకుని సేల్ డీడ్ల పేరుతో రియల్ ఎస్టేట్ వ్యాపారులు కోట్ల రూపాయల విలువైన భూములను లక్షల్లోనే స్వాహా చేస్తున్నారు.
అసలేం జరుగుతోంది!
గ్రామీణ ప్రాంతాల్లో అత్యవసర వైద్య ఖర్చులు, కుటుంబ అవసరాల కోసం డబ్బులు అవసరమయ్యే రైతులను రియల్ ఎస్టేట్ ముఠాలు లక్ష్యంగా చేసుకుంటున్నాయి. బ్యాంకులు, స్థానిక వ్యాపారుల వద్ద అప్పులు ఇప్పిస్తామని నమ్మబలుకుతున్నారు. ఈ అప్పుకు బదులుగా భద్రత పేరుతో రైతులతో సేల్ డీడ్ (అమ్మకపు ఒప్పందం) రాయించుకుంటున్నారు. దీనికి అదనంగా ఖాళీ చెక్కులను గ్యారెంటీగా తీసుకుంటున్నారు. ఇది కేవలం తాత్కాలిక భద్రత మాత్రమేనని, అప్పు తీర్చగానే భూమి తిరిగి ఇచ్చేస్తామని నమ్మబలుకుతున్నారు.
మోసం వెలుగులోకి వచ్చేదిలా!
రైతులు క్రమం తప్పకుండా వడ్డీ చెల్లిస్తూ, కొన్ని నెలల తర్వాత తమ అప్పు తీర్చి భూమిని తిరిగి తమ పేరిట మార్చుకోవడానికి ప్రయత్నించినప్పుడు అసలు మోసం బయటపడుతుంది. అప్పు ఇచ్చిన వ్యాపారులు, మధ్యవర్తులు ఫోన్లు ఎత్తకుండా ముఖం చాటేయడం మొదలుపెడతారు. అనుమానం వచ్చిన రైతులు ఆరా తీస్తే, వారికి తెలియకుండానే ఆ భూమిని మూడో వ్యక్తికి విక్రయించి ఆన్‌లైన్‌లో మార్పిడి చేసుకుంటారు. బహిరంగ మార్కెట్‌లో కోట్ల రూపాయల విలువ చేసే వ్యవసాయ భూములను కేవలం కొద్దిపాటి అప్పు పేరుతో మోసం చేసి స్వాధీనం చేసుకుంటున్నారు.
అవగాహన అత్యవసరం
చదువురాని, చట్టపరమైన అంశాలపై అవగాహన లేని రైతులను ఈ దళారీ వ్యవస్థ పూర్తిగా ముంచేస్తోంది. అత్యవసర సమయంలో ఎలాంటి పత్రాలపై సంతకాలు చేస్తున్నామో రైతులు జాగ్రత్తగా గమనించాలి. అప్పు తీసుకునే సమయంలో సేల్ డీడ్లు రాసివ్వడం ఎంత ప్రమాదకరమో ప్రతి ఒక్కరూ గ్రహించాలి. భూముల విషయాల్లో అపరిచిత వ్యక్తులు, దళారుల మాటలు నమ్మి మోసపోవద్దు. ఈ తరహా మోసాలపై సంబంధిత రెవెన్యూ, పోలీస్ యంత్రాంగం తక్షణమే స్పందించాలి. అక్రమాలకు పాల్పడుతున్న వ్యాపారులపై కఠిన చర్యలు తీసుకుని అమాయక రైతులకు న్యాయం చేయాల్సిన అవసరం ఎంతైనా ఉంది.
