గన్నేరువరం: రోజురోజుకూ పెరుగుతున్న ధరలతో కొట్టుమిట్టాడుతున్న రైతులకు ఆయిల్ పామ్ సాగు సరికొత్త ఆశాకిరణంగా మారింది. అధిక దిగుబడి, స్థిరమైన ఆదాయంతో ఈ పంట అన్నదాతల ఆర్థికాభివృద్ధికి బాటలు వేస్తోంది. గన్నేరువరం మండలంలో ఏడుగురు రైతులు సాగు చేసిన ఆయిల్ పామ్ తోటల నుంచి తొలి విడత గెలల కోత విజయవంతంగా పూర్తయింది. ఈ గెలలను ఆయిల్ఫెడ్ కార్పొరేషన్ వారు సేకరించి, సిద్దిపేట జిల్లా నర్మెట్టలోని అత్యాధునిక ఆయిల్ పామ్ ఫ్యాక్టరీకి సురక్షితంగా తరలించారు. ప్రస్తుతం మార్కెట్లో టన్ను ఆయిల్ పామ్ గెలల ధర రికార్డు స్థాయిలో రూ. 23,852 పలుకుతుండటంతో రైతులు హర్షం వ్యక్తం చేస్తున్నారు. సంప్రదాయ పంటలకు భిన్నంగా ఆయిల్ పామ్ ద్వారా ప్రతి నెలా చేతికి నికర ఆదాయం వస్తుందని, ఇది తమ జీవితాల్లో వెలుగులు నింపుతుందని సాగుదారులు ధీమా వ్యక్తం చేశారు. కాగా, గెలల సేకరణ, తరలింపు కార్యక్రమంలో వ్యవసాయ అధికారి (ఏఓ) కిరణ్మయి, ఫీల్డ్ ఆఫీసర్ యేసుమణిలతో పాటు స్థానిక రైతులు రమణారెడ్డి, నర్సింహారెడ్డి, తిరుపతి, శ్రీనివాస్ రెడ్డి తదితరులు పాల్గొని విజయవంతం చేశారు. అనుకూల ధర, ప్రభుత్వ ప్రోత్సాహంతో మండలంలో ఈ సాగు విస్తీర్ణం మరింత పెరిగే అవకాశం కనిపిస్తోంది.
Palm Oil: సంప్రదాయ పంటలకు గుడ్ బై.. పామ్ ఆయిల్ సాగుతో సిరుల పంట!
