saffron milk: గర్భధారణ సమయం ప్రతీ మహిళ జీవితంలో అత్యంత మధురమైన, అదే సమయంలో ఎంతో జాగ్రత్తగా ఉండాల్సిన దశ. ఈ తొమ్మిది నెలల ప్రయాణంలో తినే ప్రతీ ఆహారం కడుపులోని బిడ్డ ఎదుగుదలపై ప్రత్యక్ష ప్రభావం చూపుతుంది. అందుకే మన పెద్దలు, ఆయుర్వేద నిపుణులు పోషకాహారంతో పాటు కొన్ని ప్రత్యేక ఆహార పదార్థాలను సూచిస్తుంటారు. అందులో ముందుగా వినిపించే పేరు కుంకుమపువ్వు పాలు. కేవలం రంగు కోసమే కాకుండా, ఇది తల్లి ఆరోగ్యానికి చేసే మేలు అంతా ఇంతా కాదు.
మనసును ప్రశాంతంగా ఉంచే అద్భుత ఔషధం
ఈ సమయంలో హార్మోన్లలో వచ్చే వేగవంతమైన మార్పుల కారణంగా మూడ్ స్వింగ్స్, చిరాకు, అనవసరమైన ఆందోళన సహజంగానే ఎక్కువవుతుంటాయి. ఈ సమస్యకు కుంకుమపువ్వు చక్కటి పరిష్కారంగా పనిచేస్తుంది. ఇందులో ఉండే ప్రత్యేక గుణాలు మెదడులో సెరోటోనిన్ హార్మోన్ విడుదలను ప్రోత్సహిస్తాయి. దీనివల్ల మనసు ప్రశాంతంగా మారుతుంది, ఒత్తిడి తగ్గి హాయిగా ఉండగలుగుతారు.
జీర్ణ సమస్యలకు చెక్ పెడుతూ.. రక్తపోటు నియంత్రణ
గర్భిణీలు ఎదుర్కొనే సాధారణ సమస్యల్లో గ్యాస్, అజీర్ణం, మలబద్ధకం, ఉదయం పూట వాంతులు చాలా ముఖ్యమైనవి. గోరువెచ్చని పాలలో తగిన మోతాదులో కుంకుమపువ్వు కలుపుకుని తాగడం వల్ల జీర్ణక్రియ మెరుగుపడుతుంది. అలాగే, ఇందులో ఉండే పొటాషియం, యాంటీ ఆక్సిడెంట్లు రక్తపోటును అదుపులో ఉంచడంలో, గుండె పనితీరును సక్రమంగా ఉంచడంలో కీలక పాత్ర పోషిస్తాయి.
ప్రశాంతమైన నిద్ర, చురుకైన కదలికలు
శరీరంలో వచ్చే మార్పుల వల్ల చాలామందికి రాత్రుళ్లు సరిగ్గా నిద్రపట్టదు. పడుకునే ముందు ఒక గ్లాసు గోరువెచ్చని కుంకుమపువ్వు పాలు తాగితే నరాలు శాంతించి గాఢమైన నిద్ర పడుతుంది. అంతేకాకుండా, ఇది శరీరంలో రక్తప్రసరణను మెరుగుపరుస్తుంది. దీనివల్ల కడుపులో శిశువు కదలికలు చురుగ్గా మారడానికి సహకరిస్తుందని నమ్ముతారు.
ఎప్పుడు, ఎంత మోతాదులో తీసుకోవాలి?
ఈ పానీయానికి సంబంధించి చాలా మందికి ఒక అపోహ ఉంటుంది; కుంకుమపువ్వు తాగితే పుట్టబోయే బిడ్డ తెల్లగా పుడుతుందని, కానీ ఇది కేవలం అపోహ మాత్రమే. దీనివల్ల రంగు మారడం జరగదు కానీ ఆరోగ్యం మాత్రం మెరుగవుతుంది. మొదటి మూడు నెలలు గర్భాశయం సున్నితంగా ఉంటుంది కాబట్టి, వైద్యుల సలహా మేరకు సాధారణంగా 5వ నెల నుంచి దీన్ని ప్రారంభించడం సురక్షితం. ఒక గ్లాసు పాలలో కేవలం 2 నుంచి 3 రెబ్బలు మాత్రమే వాడాలి. అతిగా తీసుకుంటే శరీరంలో వేడి చేసి ప్రమాదం జరిగే అవకాశం ఉంది కాబట్టి, తగిన మోతాదులో మాత్రమే తీసుకోవడం శ్రేయస్కరం.
