Srisailam Temple: కూటమి ప్రభుత్వం అధికారంలోకి వచ్చిన తర్వాత శ్రీశైల దేవస్థానం పాలకమండలి చైర్మన్‌గా బాధ్యతలు చేపట్టిన శ్రీ పోతుగుంట రమేష్ నాయుడు విజయవంతంగా ఏడాది పాలన పూర్తి చేసుకున్నారు. ఈ సందర్భాన్ని పురస్కరించుకుని శ్రీశైలంలో ఆధ్యాత్మిక శోభ ఉట్టిపడింది. శ్రీశైల మండల బీజేపీ అధ్యక్షులు చదువుల శ్రీను నాయకత్వంలో బీజేపీ శ్రేణులు, నాయకులు ఈ వేడుకలను అత్యంత వైభవంగా నిర్వహించారు. స్వామి, అమ్మవార్ల దివ్య అనుగ్రహం రమేష్ నాయుడికి ఎల్లవేళలా ఉండాలని, ఆయన మరిన్ని ఆయురారోగ్యాలతో క్షేత్రాభివృద్ధికి సేవలు అందించాలని ఆకాంక్షిస్తూ ప్రత్యేక ఆధ్యాత్మిక కార్యక్రమాలు చేపట్టారు.
భ్రమరాంబ మల్లికార్జునులకు దివ్యాభిషేకాలు
వేడుకల్లో భాగంగా బీజేపీ శ్రేణులు శ్రీ భ్రమరాంబ సమేత మల్లికార్జున స్వామివార్లకు శాస్త్రోక్తంగా ప్రత్యేక అభిషేకం, కుంకుమార్చనలు నిర్వహించారు. దేశం సుభిక్షంగా ఉండాలని, క్షేత్ర ప్రగతి వేగవంతం కావాలని కోరుతూ గంగాధర మండపం వద్ద ఆధ్యాత్మిక నిష్టతో కొబ్బరికాయలు కొట్టి మొక్కులు తీర్చుకున్నారు. ఆ తర్వాత శ్రీశైలానికి విచ్చేసిన భక్తుల సౌకర్యార్థం నంది సర్కిల్ వద్ద భారీ అన్నప్రసాద వితరణ కార్యక్రమాన్ని ప్రారంభించారు. సుమారు 300 మందికి పైగా భక్తులకు స్వయంగా అన్నప్రసాదాలు వడ్డించి తమ భక్తిప్రపత్తులను చాటుకున్నారు.
ఏడాది కాలంలో తిరుగులేని ప్రగతి ఫలాలు
ఈ సందర్భంగా బీజేపీ నాయకుడు చదువుల శ్రీను మాట్లాడుతూ.. గడిచిన ఏడాది కాలంలో చైర్మన్ రమేష్ నాయుడు నాయకత్వంలో శ్రీశైల క్షేత్రం న భూతో న భవిష్యతి అన్నట్లుగా అభివృద్ధి పథంలో పయనిస్తోందని కొనియాడారు. ముఖ్యంగా చెంచు గిరిజనులకు ఉచిత స్పర్శ దర్శన భాగ్యం కల్పించడం, స్పర్శ, శీఘ్ర, అతిశీఘ్ర దర్శన భక్తులకు ఉచిత లడ్డూ ప్రసాదం పంపిణీ చేయడం ద్వారా సామాన్య భక్తుల హృదయాల్లో దేవస్థానం స్థానం సంపాదించుకుందన్నారు. తిరుమల తరహాలోనే సామాన్య భక్తులకు అన్ని వసతులతో కూడిన పబ్లిక్ అమినిటీస్ కాంప్లెక్స్ నిర్మాణానికి శ్రీకారం చుట్టడం ఒక చారిత్రాత్మక నిర్ణయమని ఆయన పేర్కొన్నారు.
రూ. 180 కోట్లతో శ్రీశైలానికి కొత్త శోభ
భవిష్యత్తు అవసరాలకు అనుగుణంగా మాస్టర్ ప్లాన్ రూపొందించి శ్రీశైలాన్ని గ్లోబల్ డివైన్ హబ్‌గా తీర్చిదిద్దుతున్నారని చదువుల శ్రీను తెలిపారు. రూ.180 కోట్లతో నూతన క్యూ కాంప్లెక్స్ నిర్మాణం, నక్షత్ర వనం సమీపంలో అత్యంత ప్రాశస్త్యమైన 108 అడుగుల అర్ధనారీశ్వర విగ్రహ ఆవిష్కరణకు అడుగులు పడటం విశేషమన్నారు. దీంతో పాటు కొలనుభారతి – సిద్ధవటం వంటి పురాతన ఆలయాల పునరుద్ధరణ, పవిత్ర సహస్రఘటాభిషేకం నిర్వహణ, భక్తుల పరిశుభ్రత కోసం రూ.8 కోట్లతో 20 ప్రధాన ప్రాంతాల్లో సుసజ్జిత శౌచాలయాల నిర్మాణం చేపట్టి రమేష్ నాయుడు దైవ సేవలోనే కాక భక్త సేవలోనూ ఆదర్శంగా నిలిచారని అభినందించారు.
ఈ వినూత్న ఆధ్యాత్మిక, సేవా కార్యక్రమంలో బీజేపీ సీనియర్ నాయకులు కె.శివారెడ్డి, నల్లబోతుల మల్లికార్జున, ఎం.రామకృష్ణ, మంజులమ్మ, సాయిరాజు, మాల్యాద్రి, రంగాచారి, గోదా ఆనంద్, గణేష్ మల్లికార్జున, చిత్రాల శివసాయి, జెడ్డా వెంకటేశ్వర్లు, కాంచనం వెంకటేశ్వర్లు, భాస్కర్ రావులతో పాటు పెద్ద సంఖ్యలో పార్టీ కార్యకర్తలు, భక్తులు పాల్గొని కార్యక్రమాన్ని విజయవంతం చేశారు.
