Investment Leak: దక్షిణాది రాష్ట్రాల మధ్య పారిశ్రామిక పెట్టుబడుల ఆకర్షణ విషయంలో నెలకొన్న తీవ్ర పోటీ ఇప్పుడు సరికొత్త రాజకీయ దుమారానికి దారితీసింది. తమిళనాడు రాష్ట్రానికి రావాల్సిన భారీ పెట్టుబడులకు సంబంధించిన అత్యంత రహస్య సమాచారాన్ని పొరుగు రాష్ట్రమైన ఆంధ్రప్రదేశ్కు లీక్ చేశారన్న ఆరోపణలు చెన్నై రాజకీయాల్లో ప్రకంపనలు సృష్టిస్తున్నాయి. ఈ వ్యవహారాన్ని అత్యంత తీవ్రంగా పరిగణించిన ముఖ్యమంత్రి విజయ్ నేతృత్వంలోని ప్రభుత్వం, ఏకంగా 15 మంది కాంట్రాక్టు ఉద్యోగులపై వేటు వేయడం సంచలనంగా మారింది.
రహస్య ఒప్పందాలు లేకపోవడమే అసలు లోపమా?
తమిళనాడు ప్రభుత్వానికి పెట్టుబడుల ఆకర్షణపై సలహాలు అందించే కీలక సంస్థ ‘గైడెన్స్ తమిళనాడు’ (Guidance Tamil Nadu) లో ఈ సమాచార లీకేజీ వ్యవహారం వెలుగుచూసింది. రాష్ట్రానికి రావాల్సిన కొన్ని ప్రతిష్టాత్మక ప్రాజెక్టులు, ముఖ్యంగా దక్షిణ కొరియాకు చెందిన సుమారు రూ. 1,400 కోట్ల విలువైన రెండు సంస్థల పెట్టుబడులు ఏపీ వైపు మళ్లడంపై తమిళనాడులో పెద్ద ఎత్తున చర్చ మొదలైంది. దీనిపై లోతుగా విచారణ జరిపిన పరిశ్రమల శాఖ మంత్రి ఎస్. కీర్తన, కీలక డేటాను బయటకు చేరవేసినట్లు అనుమానిస్తున్న 15 మంది కాంట్రాక్టు సిబ్బందిని జూలైలో విధుల నుంచి తొలగించినట్లు తాజాగా బయటపడింది. అయితే, ఈ ఉద్యోగులను నియమించుకునే సమయంలో ప్రభుత్వ రహస్యాలను బయటకు చెప్పకూడదనే కఠినమైన ఒప్పందాలు (NDA) లేకపోవడమే ఈ పరిస్థితికి దారితీసిందనే విమర్శలు వినిపిస్తున్నాయి.
ఏపీలో చేరికతో మరింత ముదిరిన వివాదం
తమిళనాడులో ఉద్యోగాల నుంచి తొలగించిన 15 మందిలో ముగ్గురు వ్యక్తులు, ఆ వెంటనే ఆంధ్రప్రదేశ్ ఆర్థిక అభివృద్ధి మండలి (APEDB) లో చేరినట్లు కథనాలు రావడం ఈ వివాదానికి మరింత ఆజ్యం పోసింది. తమిళనాడు ప్రభుత్వంలో కీలక బాధ్యతలు నిర్వర్తించిన వారు, తొలగింపు తర్వాత నేరుగా ఏపీ ప్రభుత్వ విభాగంలో ఎలా చేరారంటూ తమిళనాడు ప్రతిపక్షాలు ప్రశ్నల వర్షం కురిపిస్తున్నాయి. మరోవైపు, ప్రభుత్వ అసమర్థ నిర్ణయాల వల్లే పెట్టుబడులు తరలిపోతున్నాయని మాజీ మంత్రి టీఆర్బీ రాజా విమర్శించగా, తమిళనాడు నుంచి ఎలాంటి రహస్య సమాచారాన్ని తాము సేకరించలేదని ఏపీ అధికార వర్గాలు ఈ ఆరోపణలను తోసిపుచ్చాయి. మొత్తంమీద రెండు రాష్ట్రాల మధ్య పెట్టుబడుల వేట ఇప్పుడు రాజకీయ రణరంగంగా మారింది.
