KBR Park: హైదరాబాద్ నగరంలోని ప్రముఖ కాసు బ్రహ్మానంద రెడ్డి (కేబీఆర్) నేషనల్ పార్క్ చుట్టూ ప్రతిపాదించిన బృహత్తర ప్రాజెక్ట్‌పై తెలంగాణ ప్రభుత్వం అత్యంత కీలక నిర్ణయం తీసుకుంది. ట్రాఫిక్ చిక్కుల పరిష్కారం కోసం వ్యూహాత్మక రోడ్డు అభివృద్ధి ప్రణాళిక (SRDP)లో భాగంగా గతంలో రూ. 1,090 కోట్ల భారీ అంచనాతో చేపట్టిన మల్టీ-గ్రేడ్ సెపరేటర్లు, ఫ్లైఓవర్లు మరియు అండర్‌పాస్‌ల నిర్మాణ ఉత్తర్వులను ప్రభుత్వం అధికారికంగా రద్దు చేసింది.
కేబీఆర్ పార్క్ చుట్టూ మల్టీ-లెవెల్ ఫ్లైఓవర్లు, అండర్‌పాస్‌లు నిర్మిస్తే అక్కడ ఉన్న ఎకో-సెన్సిటివ్ జోన్‌ దెబ్బతింటుందని, వందలాది ఏళ్ల నాటి విలువైన చెట్లను నరకాల్సి వస్తుందని పర్యావరణ వేత్తలు, నగర నివాసితులు చాలాకాలంగా ఆందోళన వ్యక్తం చేస్తున్నారు. ప్రజాభిప్రాయాన్ని, పర్యావరణ రక్షణ ప్రాముఖ్యతను గుర్తించిన రేవంత్ రెడ్డి ప్రభుత్వం పాత డిజైన్ల ప్రాజెక్టును రద్దు చేయడమే సరైన నిర్ణయమని భావించి రద్దు ఉత్తర్వులు జారీ చేసింది.
నగరంలో పెరుగుతున్న వాహనాల రద్దీని దృష్టిలో ఉంచుకుని పర్యావరణానికి హాని కలగకుండా, ప్రత్యామ్నాయ వ్యూహాత్మక ప్రణాళికతో సవరించిన నూతన జీఓను విద్యా-పట్టణాభివృద్ధి శాఖ జారీ చేసింది. కేబీఆర్ పార్క్ చుట్టూ ఉన్న ఆకుపచ్చదనాన్ని కాపాడుతూనే, అత్యంత తక్కువ నష్టంతో వాహనాల రాకపోకలు సులువుగా సాగేలా కొత్త ప్యాకేజీని సిద్ధం చేసింది. ప్రభుత్వ తీసుకున్న ఈ నిర్ణయం పట్ల పర్యావరణ ప్రేమికులు, హైదరాబాద్ ప్రజలు తీవ్ర హర్షం వ్యక్తం చేస్తున్నారు.
