Telangana Assembly: తెలంగాణ శాసనసభ వర్షాకాల సమావేశాలు ప్రజా సమస్యల చర్చ కంటే రాజకీయ రభసకే వేదికగా మారాయి. ఆరు రోజుల పాటు నిర్వహించాలని నిర్ణయించిన ఈ సమావేశాల్లో ముఖ్యమైన బిల్లుల ఆమోదంతో పాటు, వెయ్యి రోజుల పాలనపై చర్చించాలని ప్రభుత్వం భావించింది. మరోవైపు ఇందిరమ్మ ఇళ్లు, హైడ్రా కమిషనర్ వ్యవహారం, రైతు సమస్యల ప్రాతిపదికగా ప్రభుత్వాన్ని నిలదీయాలని ప్రధాన ప్రతిపక్షం బీఆర్ఎస్ ప్రణాళికలు సిద్ధం చేసుకుంది. అయితే సమావేశాలు ప్రారంభమైన నాటి నుంచి సభలో ప్రజా సమస్యలపై చర్చ జరగకపోవడం గమనార్హం.
మొదటి రోజు నల్ల టీ-షర్టులతో బీఆర్ఎస్ శ్రేణుల నిరసన, స్పీకర్పై ఎమ్మెల్సీలు చేసిన వ్యాఖ్యలతో సభ కుదుపునకు గురైంది. రెండో రోజు కూడా ఎమ్మెల్సీల వ్యవహారం, అధికార, ప్రతిపక్షాల మధ్య పరస్పర ఆరోపణలు, సస్పెన్షన్లతోనే కాలం కరిగిపోయింది. ప్రజా సమస్యలపై క్షేత్రస్థాయిలో చర్చ జరగకుండా సభా సమయం మొత్తం వాగ్వాదాలకే సరిపోతోంది.
శాసనసభను ఒక్క రోజు నిర్వహించేందుకు దాదాపు రూ.8 నుంచి 12 లక్షల వరకు ప్రజాధనం వ్యయం అవుతోంది. వర్షాకాల ప్రభావంతో రైతులు పడుతున్న ఇబ్బందులు, రాజధానిలో శాంతిభద్రతల పరిస్థితి వంటి కీలకమైన అంశాలు అజెండాలో ఉన్నప్పటికీ, వాటిపై చర్చ జరగకపోవడంపై ఆందోళన వ్యక్తమవుతోంది. ప్రజా సమస్యలను పక్కనబెట్టి రాజకీయ పోరాటాలకే సమయాన్ని వెచ్చిస్తుండటం పట్ల తీవ్ర అసంతృప్తి వ్యక్తమవుతోంది.
