Trilateral Meeting: ప్రపంచ రాజకీయాల్లో అత్యంత అరుదైన, ఉత్కంఠభరితమైన ఘట్టానికి రంగం సిద్ధమైంది. భూగోళంపై అత్యధిక అణ్వస్త్రాలు కలిగిన మూడు అగ్రరాజ్యాలు.. అమెరికా, రష్యా, చైనా అధినేతలు ఒకే వేదికపై కలుసుకోబోతున్నారు. వచ్చే వారం చైనాలోని అత్యాధునిక సాంకేతిక నగరం షెన్‌జెన్ వేదికగా జరగనున్న ‘ఆసియా-పసిఫిక్ ఎకనామిక్ కోఆపరేషన్’ (APEC) సదస్సు ఇందుకు వేదిక కానుంది. అమెరికా అధ్యక్షుడు డొనాల్డ్ ట్రంప్, రష్యా అధినేత వ్లాదిమిర్ పుతిన్, చైనా అధ్యక్షుడు షీ జిన్‌పింగ్ మధ్య ఈ త్రైపాక్షిక భేటీ జరగనున్నట్లు వైట్ హౌస్ అధికారికంగా ప్రకటించడంతో అంతర్జాతీయ సమాజం ఒక్కసారిగా అప్రమత్తమైంది. ఒకవైపు అమెరికా-ఇరాన్ మధ్య భీకర యుద్ధం, మరోవైపు రష్యా-ఉక్రెయిన్ పోరు కొనసాగుతున్న తరుణంలో ఈ ముగ్గురు శక్తివంతమైన నేతలు ముఖాముఖి కానుండటం సర్వత్రా ఆసక్తిని రేకెత్తిస్తోంది.
అణ్వస్త్ర నియంత్రణపై ట్రంప్ పట్టు.. బీజింగ్ విముఖత
ఈ చారిత్రాత్మక భేటీ వెనుక డొనాల్డ్ ట్రంప్ ప్రధానంగా రెండు లక్ష్యాలతో అడుగుపెడుతున్నారు. ఇరాన్‌తో సాగుతున్న యుద్ధానికి ముగింపు పలకడంతో పాటు, అణ్వస్త్ర నిల్వలపై మూడు దేశాల మధ్య ఒక కొత్త ఒప్పందాన్ని కుదుర్చుకోవాలని ఆయన గట్టిగా భావిస్తున్నారు. అమెరికా, రష్యాల మధ్య దశాబ్దాలుగా ఉన్న చివరి అణ్వస్త్ర నియంత్రణ ఒప్పందం (న్యూ స్టార్ట్) గత ఫిబ్రవరిలోనే ముగిసిపోయింది. దీనితో అర్ధ శతాబ్ద కాలం తర్వాత తొలిసారిగా ప్రపంచంలోని రెండు అతిపెద్ద అణు నిల్వలపై ఎలాంటి ఆంక్షలు లేని ప్రమాదకర పరిస్థితి ఏర్పడింది. ఈ శూన్యతను భర్తీ చేస్తూ చైనాను కూడా ఇందులో భాగస్వామిని చేయాలని ట్రంప్ ప్రతిపాదిస్తున్నారు. అయితే, అమెరికా, రష్యాల వద్ద చెరో ఐదు వేలకు పైగా అణ్వస్త్రాలు ఉండగా, తమ వద్ద కేవలం 600 మాత్రమే ఉన్నాయని, కాబట్టి వారితో సమానంగా ఒప్పందం చేసుకోలేమని బీజింగ్ స్పష్టం చేస్తోంది.
ఎవరి వ్యూహాలు వారివి.. ఉక్రెయిన్‌లో మొదలైన గుబులు
చర్చల ఫలితాలపై భిన్నాభిప్రాయాలు ఉన్నప్పటికీ, ఈ భేటీ ద్వారా ఎవరికి వారు తమ రాజకీయ ప్రయోజనాలను నెరవేర్చుకునే పనిలో పడ్డారు. తన దేశంలో ఇంతటి కీలక సదస్సుకు ఆతిథ్యం ఇవ్వడం ద్వారా ప్రపంచంలో చైనా తిరుగులేని శక్తిగా ఎదిగిందని చాటుకోవాలని షీ జిన్‌పింగ్ భావిస్తున్నారు. మరోవైపు, పశ్చిమ దేశాల ఆంక్షల నడుమ తాను ఏకాకిని కాదని, అమెరికా, చైనాలతో సమానంగా ప్రపంచ గతిని మార్చగల అగ్రనేతను నేనేనని నిరూపించుకోవడానికి పుతిన్ దీనిని ఒక సువర్ణావకాశంగా మలుచుకుంటున్నారు. ముఖ్యంగా ఉక్రెయిన్ యుద్ధం విషయంలో కీలక నిర్ణయాలు తన చేతుల్లోనే ఉన్నాయనే సంకేతాలను ఆయన పంపనున్నారు. అయితే, ఈ ముగ్గురు అగ్రనేతలు తమ ప్రమేయం లేకుండా ఉక్రెయిన్ భవిష్యత్తుపై ఎలాంటి రహస్య ఒప్పందాలు చేసుకుంటారోనని ఉక్రెయిన్ అధ్యక్షుడు జెలెన్‌స్కీ తీవ్ర ఆందోళన వ్యక్తం చేస్తున్నారు.
చరిత్ర సృష్టిస్తారా? లేక ప్రతీకాత్మకంగానే మిగులుతుందా?
ప్రస్తుతం పుతిన్, జిన్‌పింగ్ మధ్య బలమైన స్నేహబంధం కొనసాగుతుండగా, ట్రంప్ సైతం ఇరు దేశాధినేతలతో తన వ్యక్తిగత సంబంధాలను మెరుగుపరుచుకునే ప్రయత్నం చేస్తున్నారు. ఇంతటి సంక్లిష్ట పరిస్థితుల మధ్య జరుగుతున్న ఈ భేటీపై అంతర్జాతీయ విశ్లేషకులు ఆచితూచి స్పందిస్తున్నారు. ముగ్గురు నేతలు ఒకే వేదికపైకి రావడం దౌత్యపరంగా చరిత్రాత్మకమే అయినప్పటికీ, అణ్వస్త్ర ఒప్పందం లేదా యుద్ధాల విరమణ వంటి కీలక అంశాలపై తక్షణమే పెద్ద ఫలితాలు రాకపోవచ్చని వారు అంచనా వేస్తున్నారు. ఈ సమావేశం కేవలం ప్రపంచానికి తమ బలాన్ని, ఐక్యతను చూపించుకునే ఒక ప్రతీకాత్మక వేదికగా మాత్రమే మిగిలిపోయే అవకాశం ఉందంటున్నారు. ఏది ఏమైనా, షెన్‌జెన్ వేదికగా వెలువడే ప్రకటనలు రాబోయే రోజుల్లో ప్రపంచ శాంతి, భద్రతలను నిర్దేశించనున్నాయి అనడంలో ఎలాంటి సందేహం లేదు.
