ఏప్రిల్ 7న వస్తుందా? లేక ‘మగధీర’ సెంటిమెంట్‌తో జూలై 31కి వెళ్తుందా? ‘వారణాసి’ రిలీజ్‌పై మళ్లీ ఉత్కంఠ

Varanasi Movie

Varanasi Movie

Varanasi Movie: ‘వారణాసి’ సినిమా విడుదల తేదీపై మరోసారి కొత్త ప్రచారాలు మొదలయ్యాయి. ముందుగా ప్రకటించిన ఏప్రిల్ 7న సినిమా విడుదల కావడం సాధ్యం కాకపోవచ్చని, అందుకే జూలై 31న ప్రేక్షకుల ముందుకు తీసుకురావాలనే ఆలోచనలో రాజమౌళి బృందం ఉన్నట్లు వార్తలు వినిపిస్తున్నాయి. ‘మగధీర’ విడుదలైన జూలై 31 తేదీని పరిశీలిస్తున్నారన్న ప్రచారం మహేష్ బాబు అభిమానుల్లో ఆసక్తితో పాటు ఆందోళనను పెంచుతోంది.

ఈసారి విడుదల తేదీ వాయిదా ఉండదని సోషల్ మీడియాలో జక్కన్న టీమ్ నుంచి సంకేతాలు వస్తున్నప్పటికీ, సినిమా ప్రమోషన్లు ఇంకా ప్రారంభం కాకపోవడం అనుమానాలకు తావిస్తోంది. ఏప్రిల్‌లో పాఠశాలల పరీక్షలు, ఐపీఎల్ సీజన్‌తో పాటు విడుదలకు వారం ముందు ‘గాడ్జిల్లా వర్సెస్ కింగ్ సూపర్ నోవా’ వంటి భారీ చిత్రం రానుండటం కూడా ‘వారణాసి’ ఓపెనింగ్స్‌పై ప్రభావం చూపే అంశాలుగా ట్రేడ్ వర్గాలు విశ్లేషిస్తున్నాయి.

మరోవైపు, ఈ సినిమాపై అంతర్జాతీయ స్టూడియోలు కూడా ఆసక్తి చూపుతున్నాయనే ప్రచారం నేపథ్యంలో ఓటీటీ ఒప్పందాలు, భారీ థియేట్రికల్ బిజినెస్‌ను దృష్టిలో పెట్టుకుని సరైన విడుదల తేదీని ఎంచుకోవాల్సిన అవసరం ఉందని అభిప్రాయాలు వ్యక్తమవుతున్నాయి. వీలైనంత వరకు పోటీ లేకుండా సోలోగా విడుదలైతే సినిమాకు మరింత ప్రయోజనం ఉంటుందని ట్రేడ్ వర్గాలు భావిస్తున్నాయి.

ఈ నేపథ్యంలో జూలై లేదా దసరా, దీపావళి పండుగల సమయంలో విడుదల చేయడం మంచిదనే అభిప్రాయాలు కూడా వినిపిస్తున్నాయి. సినిమా కంటెంట్‌కు మంచి స్పందన వస్తే భారీ వసూళ్లు సాధించే అవకాశం ఉందని అభిమానులు ఆశిస్తున్నారు. అయితే, ఇంతటి భారీ ప్రాజెక్ట్‌కు విడుదల తేదీని ఖరారు చేయడంలో సరైన ప్రణాళిక కీలకమని విశ్లేషకులు చెబుతున్నారు.

రాజమౌళి దర్శకత్వంలో తెరకెక్కుతున్న ఈ విజువల్ గ్రాండియర్‌లో ప్రియాంకా చోప్రా, పృథ్విరాజ్ సుకుమారన్ ప్రధాన పాత్రలు పోషిస్తున్నారు. ఎం.ఎం. కీరవాణి సంగీతం అందిస్తున్నారు. వచ్చే నెలలో రీ-రికార్డింగ్ పనులు ప్రారంభమయ్యే అవకాశం ఉందని ప్రచారం జరుగుతోంది. కీరవాణి తనయుడు కాల భైరవ వివాహ కార్యక్రమాలు కూడా ఉండటంతో, వాటితో పాటు సినిమా పనులను సమన్వయం చేసుకోవాల్సి ఉంటుంది.

అయితే, ఏప్రిల్ 7న విడుదల అవుతుందా? లేక జూలై 31కి వాయిదా పడుతుందా? అన్న ప్రశ్నలకు రాజమౌళి బృందం నుంచి అధికారిక స్పష్టత రావాల్సి ఉంది. విడుదల తేదీపై వస్తున్న ఊహాగానాలకు త్వరగా తెరదించితే అభిమానుల్లో నెలకొన్న సందేహాలు తొలగే అవకాశం ఉంది.