‘నాకంటే అర్హుడు ఎవరూ లేరు’.. నోబెల్ పురస్కారంపై ట్రంప్ మరోసారి హడావుడి!

ఎనిమిది యుద్ధాల నివారణే నా అర్హత: ట్రంప్ వాదన

ఇరాన్‌తో ఉద్రిక్తతలు నడుస్తోన్న తరుణంలో ట్రంప్ ఈ వ్యాఖ్యలు చేయడం ప్రాధాన్యత సంతరించుకుంది. గతం లో ఏ అమెరికా అధ్యక్షుడు కూడా చేయని విధంగా తాను ఏకంగా ఎనిమిది ఘర్షణలను, యుద్ధాలను పరిష్కరించి శాంతికి బాటలు వేశానని ఆయన పేర్కొన్నారు. ఇంకెవరూ చేయలేని సాహసోపేతమైన పనులు తాను చేశానని, అందుకే నోబెల్ శాంతి బహుమతి పొందేందుకు నూటికి నూ శాతం అర్హుడినని ట్రంప్ ధీమా వ్యక్తం చేస్తున్నారు. అయితే, తనపై ఉన్న అంచనాల గురించి మాట్లాడుతూనే, కమిటీ నిర్ణయం ఎప్పుడూ తమకు వ్యతిరేకంగానే ఉంటుందనేలా ఆయన అసంతృప్తి వెళ్లగక్కారు.

అక్టోబర్ 9న ప్రకటన.. ఉత్కంఠ రేపుతున్న నామినేషన్లు

ప్రతిష్టాత్మకమైన నోబెల్ శాంతి బహుమతిని ప్రతి ఏటా నార్వేజియన్ నోబెల్ కమిటీ ప్రకటిస్తుంది. తాజా సమాచారం ప్రకారం, 2026 సంవత్సరానికి సంబంధించిన విజేత పేరు అక్టోబర్ 9న వెల్లడికానుంది. గత ఏడాది కూడా ట్రంప్ ఈ అవార్డుపై భారీ ఆశలే పెట్టుకున్నారు. కానీ, చివరకు వెనెజువెలా విపక్ష నేత మరియా కోరీనా మచాడోను ఈ పురస్కారం వరించడంతో ట్రంప్‌కు తీవ్ర నిరాశ ఎదురైంది. ఈ ఏడాది నామినేషన్ల జాబితాలో ట్రంప్ పేరు గట్టిగా వినిపిస్తున్నప్పటికీ, చివరి నిమిషంలో కమిటీ ఎవరి వైపు మొగ్గు చూపుతుందనేది ప్రపంచవ్యాప్తంగా ఆసక్తికరంగా మారింది.

ట్రంప్ కల నెరవేరేనా? 

ప్రపంచ రాజకీయాలలో తనదైన ముద్ర వేయాలని ప్రయత్నిస్తోన్న ట్రంప్‌కు, నోబెల్ శాంతి బహుమతి సాధించడం ప్రతిష్టాత్మకమైన విషయంగా మారింది. ఆయన చేస్తున్న వాదనలు, ప్రకటనలు మీడియాలో ఎప్పుడూ హాట్ టాపిక్‌గా మారుతుంటాయి. ఈసారైనా నోబెల్ కమిటీ ట్రంప్ చేసిన శాంతి ప్రయత్నాలను గుర్తిస్తుందా, లేక గత అనుభవాల మాదిరిగానే ఈసారీ ఆయనకు నిరాశ ఎదురవుతుందా అనేది రేపటి ప్రకటనతో తేలిపోనుంది. అంతర్జాతీయ సమాజం ఉత్కంఠగా ఎదురుచూస్తున్న ఈ తరుణంలో, ఈసారి శాంతి పురస్కారం ఎవరిని వరిస్తుందో వేచి చూడాలి.