Pulivendula controversy: ఆంధ్రప్రదేశ్ స్థానిక సంస్థల ఎన్నికలు ముగింపు దశకు చేరుతున్న వేళ, రాష్ట్ర రాజకీయాలు ఊహించని రీతిలో వేడెక్కాయి. గత వైఎస్సార్‌సీపీ పాలనలో కుప్పం మున్సిపాలిటీ సహా పలు ప్రాంతాల్లో జరిగిన ఏకగ్రీవాలు, నామినేషన్ల వివాదాలను తీవ్రంగా తప్పుపట్టిన తెలుగుదేశం పార్టీ.. నేడు అధికారంలోకి వచ్చాక పులివెందుల, ప్రొద్దుటూరు వంటి ప్రతిపక్ష కోటల్లో అదే తరహా ఘర్షణలు, నామినేషన్ల లాగివేత ఆరోపణలను ఎదుర్కోవడం తీవ్ర చర్చనీయాంశంగా మారింది.
నాడు ప్రతిపక్షంలో ఉన్నప్పుడు తీవ్రంగా నిరసన తెలిపిన చంద్రబాబు, నేడు తమ ప్రభుత్వంపై వస్తున్న తీవ్ర ఆరోపణలను సాకులతో అవతలి వారిపైకి నెట్టడం సమర్థనీయం కాదని, రాజకీయ విశ్లేషకులు అభిప్రాయపడుతున్నారు.
జగన్ వ్యూహం – శాంతిభద్రతల సవాలుతో కూటమి ప్రభుత్వానికి ‘సానుభూతి’ అస్త్రం:
గతంలో స్థానిక ఎన్నికలకు దూరంగా ఉండి నష్టపోయిన వైఎస్సార్‌సీపీ.. ఈసారి ప్రతి ఒక్క స్థానంలోనూ అభ్యర్థులను ఖచ్చితంగా బరిలోకి దింపాలని, ఎక్కడా కూటమికి ఏకగ్రీవాలు కానివ్వకూడదని జగన్ మోహన్ రెడ్డి ఖచ్చితమైన ఆదేశాలిచ్చారు. నామినేషన్లు వేసే సమయంలో అడ్డంకులు ఎదురై, హింస చెలరేగితే.. అది ప్రభుత్వంపై ప్రజల్లో వ్యతిరేకతను, తమ పార్టీపై ‘సానుభూతి’ని పెంచుతుందనే ముందస్తు అంచనాతోనే జగన్ ముందడుగు వేసినట్లు కనిపిస్తోంది.
లీగల్ సెల్స్, డిజిటల్ డైరీల ద్వారా అక్రమాలను రికార్డు చేస్తూ వైఎస్సార్‌సీపీ వ్యూహాత్మకంగా అడుగులు వేస్తుండగా.. సుదీర్ఘ రాజకీయ అనుభవం ఉన్న ముఖ్యమంత్రి నారా చంద్రబాబు నాయుడు ఈ రాజకీయ ఉచ్చులో పడి ఐదేళ్ల వైఎస్సార్‌సీపీ తీరుకే తమ మార్గాన్ని కూడా మళ్లించేలా వ్యవహరిస్తున్నారనే అనుమానాలు సీనియర్ నేతలలో వ్యక్తమవుతున్నాయి.
