Jurala Water: ఉమ్మడి మహబూబ్ నగర్ (పాలమూరు) జిల్లాలో వర్షాభావ పరిస్థితుల కారణంగా సాగునీరందక ఎండిపోతున్న పంటలను చూసి రైతాంగం తీవ్ర ఆందోళన చెందుతోంది. ఈ క్లిష్ట సమయంలో పాలమూరు రైతాంగాన్ని ఆదుకోవడానికి తెలంగాణ ప్రభుత్వం వేగంగా అడుగులు వేసింది. జూరాల ప్రాజెక్టు పరిధిలోని ఆయకట్టును కాపాడేందుకు స్వయంగా తెలంగాణ ముఖ్యమంత్రి రేవంత్ రెడ్డి రంగంలోకి దిగి, సమస్య పరిష్కారానికి తక్షణ చర్యలు చేపట్టారు.
కర్ణాటక డిప్యూటీ సీఎం డీకే శివకుమార్తో ఫోన్ సంభాషణ
సమస్య తీవ్రతను గుర్తించిన సీఎం రేవంత్ రెడ్డి, కర్ణాటక ఉప ముఖ్యమంత్రి (నీటిపారుదల శాఖ మంత్రి) డీకే శివకుమార్తో నేరుగా ఫోన్లో మాట్లాడారు. పాలమూరు జిల్లాలో నెలకొన్న వర్షాభావ పరిస్థితులను, నీటి కొరత వల్ల ఎండిపోతున్న పంటల పరిస్థితిని ఆయనకు వివరించారు. మానవీయ కోణంలో ఆలోచించి జూరాల ప్రాజెక్టుకు తక్షణమే 5 టీఎంసీల నీటిని విడుదల చేయాలని విజ్ఞప్తి చేశారు. తెలంగాణ ప్రభుత్వ విజ్ఞప్తిపై కర్ణాటక ప్రభుత్వం సానుకూలంగా స్పందించి నీటి విడుదలకు సూత్రప్రాయంగా అంగీకరించింది.
బెంగళూరుకు తెలంగాణ ప్రజాప్రతినిధుల బృందం
ముఖ్యమంత్రి ఆదేశాల మేరకు మంత్రులు జూపల్లి కృష్ణారావు, లక్ష్మణ్ కుమార్, పాలమూరు జిల్లా ప్రజాప్రతినిధులు వేగంగా స్పందించారు. ఎమ్మెల్యేలు బండ్ల కృష్ణమోహన్ రెడ్డి, మేఘారెడ్డి, జీ. మధుసూదన్ రెడ్డిలతో కూడిన ప్రతినిధి బృందం ప్రత్యేకంగా బెంగళూరుకు వెళ్లి కర్ణాటక ఉప ముఖ్యమంత్రి డీకే శివకుమార్తో భేటీ అయింది. తెలంగాణ విజ్ఞప్తికి సానుకూలంగా స్పందించినందుకు కర్ణాటక ప్రభుత్వానికి, డీకే శివకుమార్కు వారు ప్రత్యేక ధన్యవాదాలు తెలిపారు.
విడతల వారీగా నీటి విడుదల.. ఊపిరి పీల్చుకున్న రైతన్నలు
జూరాల ఆయకట్టు పరిధిలో పంటలు ఎండిపోకుండా 5 టీఎంసీల నీటిని విడతల వారీగా విడుదల చేయడానికి అవసరమైన సాంకేతిక, పరిపాలనా చర్యలు తక్షణమే చేపట్టాలని తెలంగాణ బృందం కోరింది. కర్ణాటక నుండి నీటి విడుదల ఖాయం కావడంతో ఉమ్మడి మహబూబ్ నగర్ జిల్లా రైతాంగం తీవ్ర ఊరట చెందింది. సరైన సమయంలో స్పందించి నీటి సమస్యను పరిష్కరించినందుకు పాలమూరు రైతులు హర్షం వ్యక్తం చేస్తున్నారు.
