Vari Dubbu: వ్యవసాయ సంస్కృతికి, ప్రకృతి ఆరాధనకు ప్రతీకగా నిలిచే సాంప్రదాయ వరిదుబ్బు సంబరాలను అనకాపల్లి జిల్లాలోని రాయవరం గ్రామ ప్రజలు అత్యంత ఘనంగా నిర్వహించారు. కార్తీక మాసంలో పంట చేతికి వచ్చే శుభ తరుణంలో ఊరంతా రైతులు, ప్రజలు ఒక్కటై ఈ పచ్చని పంటల పండుగను అంబరాన్నంటేలా జరుపుకున్నారు. పొలానికి ప్రాణం పోసే వరి మొక్కల సమూహాన్ని “దుబ్బు”గా భావించి, పొలం నుంచి తెచ్చిన పచ్చని వరిదుబ్బును అందంగా అలంకరించి గౌరీ దేవి రూపంలో ప్రతిష్ఠించారు. అనంతరం గ్రామం అంతా అత్యంత కోలాహలంగా ఊరేగింపు నిర్వహించి, గ్రామ దేవతలకు, గౌరీదేవికి ప్రత్యేక పూజలు నిర్వహించారు.
ధాన్యం ఇంటికి వస్తే సాక్షాత్తు లక్ష్మీదేవి వచ్చినట్లేనని నమ్మే రైతు లోకం, తమకు అన్నం ప్రసాదించే ధాన్యాన్ని, పశువులకు గ్రాసమయ్యే వరి గడ్డిని కాపాడిన ప్రకృతికి కృతజ్ఞతగా ఈ సంబరాన్ని జరుపుకుంది. బతుకమ్మ, సంక్రాంతి వంటి ప్రధాన పండుగల సమయంలో వరిదుబ్బుకు పూజలు చేయడం తెలుగు రాష్ట్రాల గ్రామీణ ప్రాంతాల్లో ఆనవాయితీగా వస్తోంది. రాయవరంలో రైతన్నల కష్టానికి పచ్చని పంట రూపంలో ప్రతిఫలం దక్కినందుకు ఊరంతా ఏకమై జరుపుకున్న ఈ వరిదుబ్బు ఉత్సవం గ్రామాల్లోని ఐక్యతకు, సాంప్రదాయ పరిరక్షణకు అద్దం పట్టింది.
