మినిట్2మినిట్ డెస్క్: దక్షిణ కొరియా చరిత్రలోనే అత్యంత భయంకరమైన సంచలన కథనం ఇది. బయటకు అమాయకంగా, అందమైన రూపంతో కనిపించే ‘నో సున్-జా’ అనే మహిళ వెనుక ఒక రాక్షసి ఉందంటే ఎవరూ నమ్మలేకపోయారు. లగ్జరీ జీవితానికి అలవాటుపడిన ఆ సైకో మహిళ, కనీసం ఊహించని రీతిలో సొంత కుటుంబంపైనే దారుణాలకు తెగబడింది.
ఆమె తన మొదటి భర్త పేరు మీద అతనికి తెలియకుండా అనేక ఇన్సూరెన్స్ పాలసీలు తీసుకుంది. ఆ తర్వాత అసలు కథ మొదలుపెట్టింది. అతడికి రోజూ ఇచ్చే ఆహారంలో కొద్దికొద్దిగా నిద్రమాత్రలు, క్రిమిసంహారక మందులు కలుపుతూ వచ్చేది. అతడు శారీరకంగా, మానసికంగా తీవ్రంగా బలహీనపడిన తర్వాత, ఒకరోజు అర్ధరాత్రి అతడి కళ్లల్లో ప్రమాదకరమైన కెమికల్ పోసి చూపు పోయేలా చేసింది. కొద్దిరోజులకే విషమిచ్చి దారుణంగా చంపేసింది. ఇన్సూరెన్స్ కంపెనీలు అది అనుమానాస్పద మృతి కాదని భావించి ఆమెకు భారీగా పరిహారం చెల్లించాయి.
వచ్చిన డబ్బుతో విలాసవంతమైన జీవితం గడిపిన ఆ మహిళ, అవి అయిపోగానే మరో ఎర వేసింది. రెండో పెళ్లి చేసుకుని, ఆ రెండో భర్తను కూడా సరిగ్గా అదే శైలిలో కళ్లు పోగొట్టి, విషమిచ్చి దారుణంగా పొట్టన పెట్టుకుంది. ఇన్సూరెన్స్ డబ్బుల కోసం ఆమె చూపిన క్రూరత్వం అంతటితో ఆగలేదు.
ఆమె పగలు ప్రాణ స్నేహితురాలిగా, రాత్రి కనుపాపలను తీసే కాళరాత్రిగా మారింది. కన్నతల్లి, సొంత సోదరుడి ఆహారంలో కూడా సైలెంట్ పాయిజన్ కలిపి ఇచ్చి వారిద్దరికీ చూపు పోయేలా చేసింది. ఆపై వారినీ మట్టుబెట్టి ఇన్సూరెన్స్ సొమ్మును నొక్కేసింది. కన్నుమిన్ను కానక ప్రవర్తించిన ఆ సైకో మహిళ, చివరికి సాక్ష్యాలు లేకుండా చేసేందుకు సొంత ఇంటికే నిప్పుపెట్టి మిగతా కుటుంబ సభ్యులను కూడా సజీవ దహనం చేయడానికి యత్నించింది.
వరుసగా ఒకే ఇంట్లో అనుమానాస్పద మరణాలు జరగడం, అందరి పేరిట భారీగా ఇన్సూరెన్స్ క్లెయిమ్లు రావడం చూసి అనుమానం వచ్చిన పోలీసులు లోతుగా విచారణ చేపట్టారు. విచారణలో బయటపడిన నిజాలు చూసి పోలీసు అధికారులే దిగ్భ్రాంతి చెందారు. మానసిక వైద్యులు ఆమెను పరీక్షించి, ఆమె అత్యంత తీవ్రమైన సైకోప్యాథిక్ డిజార్డర్తో బాధపడుతోందని తేల్చారు. అమాయకుల ప్రాణాలను బలితీసుకున్న ఆ కసాయి మహిళను కోర్టు విచారించి కఠిన శిక్ష విధించింది.
