Go Rural: మేడ్చల్ జిల్లా కీసర మండలంలోని ‘గో రూరల్ ఇండియా ప్రైవేట్ లిమిటెడ్’ (Go Rural India Pvt Ltd) సంస్థలో కొనసాగుతున్న నిబంధనల ఉల్లంఘనలు ఒక్కొక్కటిగా వెలుగులోకి వస్తున్నాయి. ఒక పేద డ్రైవర్ విధి నిర్వహణలో ప్రాణాలు కోల్పోయిన ఘటనతో, ఆ కంపెనీలో కార్మిక చట్టాలు ఏ స్థాయిలో తుంగలో తొక్కబడుతున్నాయో బట్టబయలైంది. నాలుగు దక్షిణాది రాష్ట్రాల్లో వ్యాపార కార్యకలాపాలు సాగిస్తున్న ఈ సంస్థపై ఇప్పటికే కోట్లాది రూపాయల ఆర్థిక మోసం, ఈడీ (ED) కేసుల చరిత్ర ఉండటం గమనార్హం.
కనీస భద్రత కరవు – చట్టాలకు తిలోదకాలు
ఆంధ్రప్రదేశ్, తెలంగాణ, కర్ణాటక, తమిళనాడు రాష్ట్రాల్లో వ్యాపారం చేస్తున్న ఈ సంస్థలో పనిచేస్తున్న కార్మికులకు ఎలాంటి సామాజిక భద్రత లేదని సిబ్బంది ఆవేదన వ్యక్తం చేస్తున్నారు. నిబంధనల ప్రకారం ప్రతి ఉద్యోగికి అందించాల్సిన పీఎఫ్ (PF), ఈఎస్ఐ (ESI) వంటి కనీస సౌకర్యాలు కూడా కల్పించడం లేదని కార్మికులు వాపోతున్నారు. అంతేకాకుండా, కంపెనీ బయట కనీసం సంస్థ పేరుతో కూడిన బోర్డు గానీ, లోపల ప్రమాదాలు జరిగితే రక్షించే ఫైర్ సేఫ్టీ ప్రమాణాలు గానీ లేకపోవడం పలు అనుమానాలకు తావిస్తోంది. ఇటీవల ఇదే సంస్థలో 12 ఏళ్లుగా పనిచేస్తున్న డ్రైవర్ మంచిల్ల రమేశ్ (35) డ్యూటీ నిమిత్తం కర్ణాటకకు వెళ్లి మృతి చెందగా, బాధిత కుటుంబాన్ని ఆదుకోవాల్సింది పోయి యాజమాన్యం తొలుత నిర్లక్ష్యంగా వ్యవహరించింది. మీడియా ప్రతినిధులు నిలదీయడంతో దిగివచ్చి అంత్యక్రియలకు రూ. 50 వేలు, మృతుడి కుమార్తె పేరుపై నగదు డిపాజిట్ చేసేందుకు అంగీకరించింది.
నేరచరిత్ర ఉన్న యాజమాన్యం – రూ. 21.72 కోట్లు ఆర్టీసీకి ఎగనామం
ఈ సంస్థ నిర్వాహకులు వడ్డాను సునీల్, అతని భార్య చేబ్రోలు మృదుల వ్యవహారశైలి మొదటి నుంచీ వివాదాస్పదంగానే ఉంది. 2015 నుంచి 2021 వరకు టీజీఎస్ఆర్టీసీ (TGSRTC) బస్సులపై వాణిజ్య ప్రకటనల కాంట్రాక్టు దక్కించుకున్న ‘గో రూరల్ ఇండియా’, లైసెన్స్ ఫీజు కింద ఆర్టీసీకి చెల్లించాల్సిన రూ. 21.72 కోట్ల బకాయిలను ఎగవేసింది. బకాయిల కోసం ఇచ్చిన రూ. 50 లక్షల విలువైన ఐదు చెక్కులు బౌన్స్ కావడంతో పాటు, క్లయింట్ల నుండి వసూలు చేసిన నిధులను అనుబంధ సంస్థలు, వ్యక్తిగత ఖాతాల్లోకి మళ్లించి ఆస్తులు, విలాసవంతమైన వాహనాలు కొనుగోలు చేసినట్లు దర్యాప్తులో తేలింది. ఈ వ్యవహారంలో హైదరాబాద్ సీసీఎస్ పోలీసులు 2024 ఫిబ్రవరిలో సునీల్ను మోసం, నమ్మకద్రోహం సెక్షన్ల కింద అరెస్ట్ చేశారు. అనంతరం మనీలాండరింగ్ నిరోధక చట్టం (PMLA) కింద విచారణ చేపట్టిన ఎన్ఫోర్స్మెంట్ డైరెక్టరేట్ (ED), 2025 ఫిబ్రవరిలో సంస్థకు, నిర్వాహకులకు చెందిన రూ. 6.47 కోట్ల విలువైన స్థిరాస్తులను జప్తు చేసింది.
డ్రైవర్ మృతితో బయటపడ్డ యాజమాన్య తీరు
ఇటీవల ఇదే సంస్థలో 12 ఏళ్లుగా డ్రైవర్గా పనిచేస్తున్న మంచిల్ల రమేశ్ (35), కంపెనీ డ్యూటీ నిమిత్తం కర్ణాటకకు వెళ్లి అనారోగ్యంతో మృతి చెందాడని ఈ నెల 18న కుటుంబ సభ్యులకు సమాచారం అందింది. మృతదేహాన్ని శుక్రవారం కంపెనీ వద్దకు తీసుకురాగా, బాధిత కుటుంబాన్ని ఆదుకోవాల్సింది పోయి యాజమాన్యం తొలుత నిర్లక్ష్యంగా వ్యవహరించడంపై తీవ్ర నిరసన వ్యక్తమైంది. చివరకు మీడియా ప్రతినిధులు నిలదీయడంతో దిగివచ్చిన సంస్థ, అంత్యక్రియలకు రూ. 50 వేలు అందించి, మృతుడి కుమార్తె పేరుపై నగదు డిపాజిట్ చేసేందుకు అంగీకరించింది.
పలుకుబడితో వ్యవస్థలను ప్రభావితం చేస్తున్నారా?
ఇన్ని తీవ్రమైన ఆరోపణలు, కేసులు ఉన్నప్పటికీ సునీల్, మృదుల తమకున్న పలుకుబడితో అధికారులను, పోలీసులను ఫోన్ల ద్వారా మేనేజ్ చేస్తూ యథేచ్ఛగా కార్యకలాపాలు సాగిస్తున్నారని స్థానిక గ్రామస్థులు ఆరోపిస్తున్నారు. ఎవరైనా ప్రశ్నిస్తే పోలీసు బందోబస్తుతో భయపెట్టే ధోరణిని అవలంబిస్తున్నారని విమర్శిస్తున్నారు. కార్మిక చట్టాలను ఉల్లంఘిస్తూ, భద్రతా ప్రమాణాలు పాటించకుండా నడుస్తున్న ఈ సంస్థపై కార్మిక, అగ్నిమాపక శాఖల ఉన్నతాధికారులు తక్షణమే సమగ్ర విచారణ జరిపి కఠిన చర్యలు తీసుకోవాలని ప్రజాసంఘాలు డిమాండ్ చేస్తున్నాయి.
