భద్రతకు రక్షా బంధనాలు
మీ సురక్ష .. సహచరి కార్యక్రమంలో ఘనంగా రాఖీ వేడుకలు
మినిట్ 2 మినిట్, ప్రతినిధి (ఆగస్ట్ 28): ప్రజా భద్రతే ధ్యేయంగా సాగుతున్న ‘మీ సురక్ష – సహచరి’ కార్యక్రమంలో భాగంగా గురువారం “సహచరులతో రాఖీ వేడుకలు” కార్యక్రమాన్ని ఎల్బీనగర్ పోలీసులు వైభవంగా నిర్వహించారు. స్థానిక సీఐ వినోద్ కుమార్, సబ్ ఇన్స్పెక్టర్ (ఎస్సై) సతీష్, కమ్యూనిటీ ఆధారిత (బిసి) పోలీస్ సిబ్బంది సమక్షంలో ఈ వేడుకలు జరిగాయి. సమాజ రక్షణలో కీలక పాత్ర పోషిస్తున్న సహచరులను ఈ సందర్భంగా ఘనంగా సత్కరించి, ప్రత్యేక గిఫ్ట్ హ్యాంపర్లు, అవగాహన కరపత్రాలను అందించారు.
ఈ సందర్భంగా ఏర్పాటు చేసిన ప్రత్యేక ముఖాముఖి కార్యక్రమంలో సామాజిక సమస్యలు, మహిళలు-చిన్నారుల భద్రత, నేరాల నియంత్రణపై విస్తృత అవగాహన కల్పించారు. కమ్యూనిటీ భద్రతను మరింత పటిష్టం చేయడంలోనూ, పోలీస్-ప్రజల మధ్య సంబంధాలను బలోపేతం చేయడంలోనూ సహచరులు తమవంతు మద్దతును నిరంతరం కొనసాగించాలని పిలుపునిచ్చారు. ప్రజా రక్షణలో ప్రతి ఒక్కరి భాగస్వామ్యం ఎంతో కీలకమని, ఫ్రెండ్లీ పోలీసింగ్కు ఇటువంటి కార్యక్రమాలు మరింత తోడ్పడతాయని ఎస్సై సతీష్ పేర్కొన్నారు.
