కలిసొచ్చిన క్రూడ్ ఆయిల్ పతనం.. రాకెట్‌లా పరుగెత్తిన సెన్సెక్స్, నిఫ్టీ!

Stock Market: వారం ప్రారంభంలోనే దేశీయ స్టాక్ మార్కెట్లు విపరీతమైన ఉత్సాహాన్ని నింపాయి. గత కొన్ని రోజులుగా ఊగిసలాటలో ఉన్న సూచీలు సోమవారం ఒక్కసారిగా రాకెట్‌లా పరుగెత్తాయి. బొంబాయి స్టాక్ ఎక్స్చేంజ్ సూచీ సెన్సెక్స్ ఏకంగా 1,233.25 పాయింట్లు (1.66 శాతం) పెరిగి 75,692.78 వద్ద రికార్డు స్థాయిలో స్థిరపడింది. మరోవైపు జాతీయ స్టాక్ ఎక్స్చేంజ్ సూచీ నిఫ్టీ కూడా 387.70 పాయింట్లు (1.68 శాతం) లాభపడి 23,440.80 స్థాయికి చేరింది. రోజంతా బుల్స్ ఆధిపత్యం స్పష్టంగా కనిపించడమే కాకుండా, రెండు సూచీలూ రోజులో అత్యధిక గరిష్ఠ స్థాయిల వద్దే ముగియడం విశేషం.

అంబానీ దెబ్బకు రికార్డులు ఎదురుచూపులు: 

ఈ భారీ ర్యాలీకి అసలు సిసలైన హీరోగా రిలయన్స్ ఇండస్ట్రీస్ (RIL) నిలిచింది. దిగ్గజ సంస్థ రిలయన్స్ షేరు ఏకంగా 11.64 శాతం భారీ లాభాన్ని నమోదు చేసి మార్కెట్‌ను ముందుండి నడిపించింది. రిలయన్స్‌తో పాటు టాటా స్టీల్ (5.64%), అల్ట్రాటెక్ సిమెంట్ (2.75%), ఎస్‌బీఐ (2.71%), ఎన్‌టీపీసీ (2.37%), మారుతి సుజుకి (2.16%) షేర్లు కూడా భారీ కొనుగోళ్లతో లాభాల బాట పట్టాయి. ఆయిల్ అండ్ గ్యాస్ సూచీ 5.95 శాతం పెరిగి అగ్రస్థానంలో నిలవగా, మెటల్, కన్జ్యూమర్ డ్యూరబుల్స్, రియల్టీ, ఆటో రంగాలు కూడా పెట్టుబడిదారులకు మంచి లాభాలను అందించాయి.

ఊరటనిచ్చిన ముడి చమురు.. ఇరాన్-అమెరికా చర్చలతో శాంతించిన క్రూడ్

మార్కెట్ల పరుగుకు అంతర్జాతీయంగా తగ్గిన చమురు ధరలు కూడా ఒక ప్రధాన కారణమయ్యాయి. అమెరికా మరియు ఇరాన్ మధ్య దౌత్యపరమైన చర్చలు మళ్లీ మొదలవ్వడంతో చమురు సరఫరాపై ఉన్న ఆందోళనలు కాస్త తగ్గాయి. దీంతో అంతర్జాతీయ మార్కెట్‌లో క్రూడ్ ఆయిల్ ధరలు 4 శాతానికి పైగా దిగొచ్చాయి. డబ్ల్యూటీఐ క్రూడ్ 4.23 శాతం తగ్గి బ్యారెల్‌కు 99.72 డాలర్లకు పడిపోగా, బ్రెంట్ క్రూడ్ 4.28 శాతం తగ్గి 108.57 డాలర్ల వద్ద క్లోజ్ అయింది. భారత ఆర్థిక వ్యవస్థకు ఇది అతిపెద్ద ఊరటనిచ్చే అంశం కావడంతో దలాల్ స్ట్రీట్‌లో కొనుగోళ్ల పండుగ వాతావరణం నెలకొంది.

ఐటీ షేర్లపై ఒత్తిడి.. ఇన్ఫోసిస్ స్వల్ప నష్టం

మార్కెట్లు భారీ లాభాల్లో ముగిసినప్పటికీ కొన్ని రంగాల్లో అమ్మకాల ఒత్తిడి తప్పలేదు. ముఖ్యంగా ఐటీ కంపెనీల షేర్లు స్వల్ప నష్టాలను చవిచూశాయి. ఐటీ దిగ్గజం ఇన్ఫోసిస్ 1.61 శాతం నష్టపోయి టాప్ లూజర్‌గా నిలవగా, టెక్ మహీంద్రా, టీసీఎస్ షేర్లు కూడా స్వల్పంగా తగ్గాయి. వీటితో పాటు కోటక్ మహీంద్రా బ్యాంక్ (0.65%), ఐసీఐసీఐ బ్యాంక్ (0.63%), సన్ ఫార్మా (0.58%), యాక్సిస్ బ్యాంక్ (0.47%) నష్టాల్లో ముగిశాయి. అయితే, ఓవర్‌ఆల్‌గా మార్కెట్ సెంటిమెంట్ మాత్రం చాలా సానుకూలంగా ఉండటంతో ఇన్వెస్టర్ల సంపద ఒక్కరోజే గణనీయంగా పెరిగింది.