Vijay Annamalai: యువ కథానాయకుడు విజయ్ దేవరకొండ, రష్మిక మందన్న జంటగా నటించిన పీరియాడిక్ యాక్షన్ డ్రామా ‘రణబాలి’ విడుదలకు సిద్ధమవుతోంది. రాహుల్ సాంకృత్యాన్ దర్శకత్వంలో తెరకెక్కిన ఈ భారీ చిత్రం దసరా కానుకగా అక్టోబర్ 16న థియేటర్లలో సందడి చేయనుంది. ఈ నేపథ్యంలో చిత్ర బృందం చేపడుతున్న ప్రచార కార్యక్రమాలు అందరి దృష్టిని ఆకర్షిస్తున్నాయి. అందులో భాగంగా నిర్వహించిన ‘రణబాలి హిస్టారిక్ కన్వర్జేషన్’ లో మాజీ ఐపీఎస్ అధికారి, ప్రముఖ రాజకీయ నాయకుడు అన్నామలైతో పాటు ప్రముఖ న్యాయవాది జె. సాయి దీపక్‌లతో విజయ్ దేవరకొండ, దర్శకుడు రాహుల్ ప్రత్యేకంగా ముచ్చటించారు. ఈ భేటీలో విజయ్ దేవరకొండ చేసిన వ్యాఖ్యలు ప్రస్తుతం నెట్టింట తీవ్ర చర్చనీయాంశంగా మారాయి.
చరిత్ర పేజీల్లో దాగివున్న నిజాలు: ప్రశంసలు కురిపించిన అన్నామలై
ఈ ప్రత్యేక చర్చలో అన్నామలై మాట్లాడుతూ ‘రణబాలి’ సినిమాను ఉద్దేశించి పలు కీలక వ్యాఖ్యలు చేశారు. 1854 నుంచి 1878 మధ్య కాలంలో బ్రిటిష్ పరిపాలనలో దక్షిణ భారతదేశంలో సంభవించిన ఘోర కరవు, ఆ సమయంలో బ్రిటిష్ పాలకులు చూపించిన దౌర్జన్యాలు, దాష్టీకాల ఆధారంగా ఈ చిత్రాన్ని తెరకెక్కించినట్లు చిత్ర యూనిట్ వెల్లడించింది. దీనిపై స్పందించిన అన్నామలై.. పాఠ్యపుస్తకాలకు పరిమితం కాకుండా చరిత్రలో తొక్కిపెట్టిన అనేక నగ్న సత్యాలను ఈ సినిమా ద్వారా వెలికితీసే ప్రయత్నం చేయడం అభినందనీయమన్నారు. బ్రిటిషర్లు మన వ్యవస్థలను వాడుకుని దాచిపెట్టిన చారిత్రక నిజాలను తెలుసుకోవడానికి ప్రతి భారతీయుడు తప్పక ‘రణబాలి’ చిత్రాన్ని చూడాలని ఆయన పిలుపునిచ్చారు.
‘రియల్ సింగం.. ప్రామిసింగ్ లీడర్’: అన్నామలైకి విజయ్ గ్రాండ్ కితాబు
ఇదే వేదికపై విజయ్ దేవరకొండ మాట్లాడుతూ అన్నామలై వ్యక్తిత్వాన్ని, ఆయన రాజకీయాన్ని ఆకాశానికెత్తేశారు. “తమిళనాడుకు చెందిన మాజీ ఐపీఎస్ అధికారి అన్నామలై అన్నను అందరూ ‘రియల్ సింగం’ అని పిలుస్తారు. నేను ఆయన మునుపటి ఇంటర్వ్యూలు చాలా చూశాను. ఆయన ఎంతో మేధస్సు, స్పష్టమైన విషయ పరిజ్ఞానంతో మాట్లాడుతారు. మన దేశంలో ఆయన లాంటి అద్భుతమైన వక్తలైన నాయకులను చూడటం ఒక ప్రత్యేకమైన అనుభూతినిస్తుంది. ఒక యువకుడిగా ఇటువంటి నాయకులను చూస్తే నాకు ఎంతో ఆత్మవిశ్వాసం కలుగుతుంది. ఆయన నిజంగా ఒక ప్రామిసింగ్ లీడర్. భవిష్యత్తు రాజకీయాల్లో ఆయన ప్రభావం ఎలా ఉండబోతోందో చూడటానికి నేను ఎంతో ఆసక్తిగా ఎదురుచూస్తున్నాను” అని విజయ్ మనసులోని మాటను బయటపెట్టారు.
సినీ, రాజకీయ వర్గాల్లో హాట్ టాపిక్‌గా మారిన ముచ్చట!
సాధారణంగా సినీ నటులు రాజకీయ నాయకులపై బహిరంగంగా ప్రశంసలు కురిపించడానికి కొంత సంకోచిస్తుంటారు. అయితే, విజయ్ దేవరకొండ ఏమాత్రం దాపరికాలు లేకుండా ఒక ప్రముఖ రాజకీయ నేతపై ఈ స్థాయిలో ప్రశంసల వర్షం కురిపించడం ఇప్పుడు రెండు తెలుగు రాష్ట్రాలతో పాటు తమిళనాడులోనూ సంచలనంగా మారింది. చరిత్ర నేపథ్యంతో వస్తున్న ‘రణబాలి’ సినిమాపై ఇప్పటికే భారీ అంచనాలు ఉండగా, అన్నామలై-విజయ్ దేవరకొండల మధ్య జరిగిన ఈ వైవిధ్యమైన ముచ్చట సినిమాపై మరింత హైప్‌ను పెంచేసింది. దసరా బరిలో దిగుతున్న ఈ పీరియాడిక్ డ్రామా ప్రేక్షకులను ఏ మేరకు మెప్పిస్తుందో వేచి చూడాలి.
